مع مرور الوقت وتغير الزمن صارت الالتزامات أكثر والضغط اللي نحس فيه يسبب لنا التوتر والقلق وبالتالي نفقد التوازن وتصير حياتنا مذبذبة مثل السفينة بلا قبطان تتحرك وماتعرف المكان اللي تبي توصل له وأبسط موجه تساعد في انهيار هيكلها. الشخص بلا توازن وأهداف واضحة راح يكون حاله مثل حال السفينة. وعشان نوصل لحالة الاتزان المطلوبة واللي بتساعدنا في الوصول لأهدافنا لابد نتعلم الهدوء والتركيز وعشان نتعلمهم لابد ان تكون لدينا ثقة بأنفسنا وبأن الله سيختار لنا كل جميل.
ممكن البعض يسأل كيف أكون هادئ ومحافظ على تركيزي!
فيه بعض الجوانب إذا اهتميت فيها راح توصل ان شاء الله للتركيز المطلوب
وأولها:
العقل:
لابد ان يكون صافي ومافي أي موضوع شاغل بالك . توجه تركيزه على الشغلة
اللي انت تبيها وماتشتته بكذا شغله مع بعض لان راح تحس بالتوتر والضغط وبالتالي
ماراح تستفيد شيء (لاانت اللي أنجزت هدفك ولا اللي ابتكرت طريقة لانجازه). لذالك
حاول تسوي عملية فورمات لعقلك قبل البدء بأي خطوة في تحقيق هدفك لتبدأ بعقل صافي
ومركز. أيضا مانهمل أهمية تثقيف العقل وتغذيته بالمواضيع والمعلومات المناسبة اللي
تفيدك في تطوير طريقة تفكيرك وتعاملك مع الأمور وتعلم السيطرة على عقلك وذاتك.
الجسد:
ربي وهبنا نعمة الصحة والعافية ومحافظتنا عليها يعتبر شكر لله على هذه
النعم. كيف ممكن نحافظ عليه!
الإجابة اللي خطرت في بالك اول ماقرأت السؤال صحيحه, فعلا نحافظ عليه
بالتغذية السليمة اللي تمدنا بالطاقة وممارسة الرياضة لان هالأمرين يساعدون في
تجديد نشاطنا وحيوتنا وبالتالي نتخلص من التوتر والقلق اللي يأثر على عقلنا ويشل
تفكيرنا ويأثر على جسمنا ويخلينا نحس بالكسل والخمول. يعني لو مااهتميت بجسدك راح
تخسر الطرفين عقلك وصحة جسمك. لذالك حط عقلك براسك واهتم بصحتك وجسمك بشكل صحي
وسليم عشان تتخلص من المعوقات اللي تمنعك عن الإنجاز وتحقيق أحلامك. افضل حل
للتخلص من الطاقة السلبية والكسل هو الرياضة لو عشر دقايق.
البيئة:
المقصود فيها المحيط اللي حولك والمكان اللي تعيش فيه. هالجانب مهم
جدا جدا لان تأثيره على الجانبين السابقين قوي. اذا كانت البيئة هادئة ومستقرة راح
ينعكس هالشي على عقلك وجسدك وبالتالي درجة انجازك. حاول تخلق لك بيئة هادئة ومزودة
بكل ماتحتاج اليه من احتياجات أساسية (اكل وشرب ولبس) واحتياجات فرعية(أشياء تحتاجها
لكن ممكن تستغني عنها وتختلف من شخص لشخص) وان كانت بسيطة فالبساطة حلوه. تخلص من الأمور
اللي ممكن تسبب لك تشتت أو ضغط وابتعد عن الناس السلبية والمحبطة واختلط أكثر
بالناس الإيجابية والمحفزة. كل ماكانت البيئة هادئة كل ماكان تركيزك قوي وبالتالي
يزيد انتاجك بجودة عالية. لابد ان تسخر بيئتك لخدمتك وتنفيذ احتياجاتك.
المعرفة:
الاطلاع على المجالات المختلفة والتي لها علاقة بهدفك راح تساعدك في
الهدوء والتركيز لان لما يكون عندك معلومات كافيه وخلفية عن الموضوع راح تحس
بالطمأنينة وهالشي مهم للحفاظ على تركيزك. اقرأ وابحث واسأل الين تحس نفسك مستعد
للبدء في تحقيق هدفك. تخيل نفسك يوم الاختبار لو ماكنت مذاكر زين وفاهم المادة
وعارف وش فيها وكيف طريقة المعلم في الأسئلة راح تحس بتوتر وقلق لدرجة ماتاكل
وماتعرف تفكر زين ومو واثق ومتردد وفي الأخير تجيب العيد في المادة , بعكس لو كنت
مذاكر زين وعارف الأشياء المهمه اللي ممكن تجي في الاختبار تدخل وانت واثق من نفسك
ومتأكد انك بتجيب معدل حلو لانك استعديت صح و زودت نفسك بالمعلومات.
التخطيط الجيد:
بعد ماجمعت المعلومات اللي راح تخدمك وتساعدك في انجاز هدفك صار وقت التخطيط لان بدون تخطيط ماراح تستفيد شي. لازم تكون عارف كيف بتحقق هدفك وش
الطريقة المناسبة والسهلة. التخطيط يوفر عليك الجهد والوقت. لما تكون عارف كيف
بتنفذ هالهدف راح تكون مطمن ومتفائل وبالتالي تحافظ على هدوئك وتركيزك.
مثل ما لاحظت كل جانب مرتبط بالثاني يعني ماينفع نركز على واحد ونترك
الثاني. جوانب متكاملة ومترابطة اذا نجح واحد بينجح الثاني لان مو معقولة مثلا
اخطط واجمع معلومات وانا بيئتي ماتساعد ابدا أو اللي حولي مكسرين مجاديفي. وتكامل
هالجوانب يساعدك في اتخاذ القرارات المناسبة لذاتك. لذالك هيأ جميع الجوانب لتصل
الى الهدوء والتركيز لأنهم بيساعدونك على الإنجاز وتعيش الحياة اللي تبيها.
