تحفيز الذات #2
3:19 AM
وجى الوقت اللي نكمل فيه الجزء الثاني من تحفيز الذات ومهم جدا ماننسى
بأن الشخص هو المسئول الوحيد عن تحفيز ذاته او احباطها والتسبب بفشلها. مهما صار
ومهما سويت ماراح تلاقي نتيجة مرضية اذا ماكنت مقتنع بما تملك ومؤمن بذاتك
ومقدرها.
قبل ما أبدا الموضوع طويل حبتين فأنصحكم تجيبون عصير او شاهي وتكونون
رايقيين
نبدأ بتكملة الأمور اللي تحفزنا:
سابعا: الإحساس بالمسئولية
لما تكون شخص مقدر للعمل اللي تسويه وحاس بالمسئولية اتجاهه وحاس
بأهميته تأكد بأنك راح تكون منتبه لكل خطوة تسويها ومحافظ على روحك العالية وتستمر
في الإنجاز.
ثامنا: التنظيم والتخطيط
عشان تبدأ صح وتكون امورك كلها في السليم والهمه عالية عندك لازم تكون
عارف وش تبي بالضبط. فكر وش الأشياء اللي فعلا تبيها وتتمنى تنجزها بعد كذا حدد وش
الأهم بالنسبة لك ورتبها ونظمها بحسب الأهمية, بعدها ابدأ بالتخطيط الجيد وحدد
الطريقة المناسبة لإتمام الامر في الوقت الذي تراه ملائم لك وللهدف. ولاتنسى ان
المرونه شرط أساسي للخطة عشان تتماشى مع الظروف اللي حولك واللي ممكن تصير فجأه.
تاسعا: انتقد ذاتك
تكلمت عن تقدير الذات في الجزء الأول ونبهت على ان الثقه بنفسك مهمه
جدا جدا جدا لان لو ماوثقت بنفسك مستحيل
احد يثق فيك , كيف تطالب الناس تثق فيك وانت أساسا مو واثق فيها, لكن هذا
مايمنعك من انتقاد نفسك . مثلا لو صار نقاش بينك وبين أحد افراد العائلة او زملاء
العمل او رئيسك وصدر منك كلمة مالها داعي او سويت تصرف يجرح الطرف الثاني أكيد لما
تكون بروحك راح تفكر باللي صار وتحس بالندم وتتمنى ماقلته وتبدأ تحاسب نفسك (ليش
سويت كذا/افضل لو ما سويت هالتصرف/لو استبدلت هالكلمة بكلمة ثانيه / المفروض مسكت
نفسي/انا شخص متسرع لازم اتحكم بانفعالاتي) هذا هو انتقاد الذات المقصود انتقاد غير
محبط. انقد نفسك ولكن بلطف لاتنقدها بشكل يخليك تحس بالإحباط وبأنك شخص ماتستاهل
ولاتنقدها بشكل خفيف كأنك تسلك لها, انقد بوسطية بحيث تعاتبها وتنصحها بنفس الوقت
وتساعدها تكتشف الحل البديل المناسب مثل المثال المذكور.
عاشرا: ابتعد عن الاعذار قدر استطاعتك
الاعذار هي السبب الرئيسي للتكاسل وفقدان الحماس. فكل مره انت تقدم
الاعذار لنفسك عن عمل تهاونت في إنجازه تأكد بأنك تقلل من كفائتك وتقتل روح المثابرة
عندك وبالتالي ماراح تكون مُحفز ابدا لانجاز أي امر. احذر من التماس العذر لذاتك
عند التقصير بل عاقبها وعوض عليها. كيف أعاقبها؟! بالانتقاد والحرمان مما تحب عشان
تحس بأهمية الامر وتتحمل مسئولية التأجيل وتتوب عن تقديم الاعذار اللي مالها داعي.
طبعا يستثنى لو كان العذر صادق وقوي.
الحادي عشر: التعلم المستمر
اطلاعك على مختلف الأمور والقراءة عنها او مجالسة العلماء والناس
الفاهمه راح يخليك دائما متحمس تتعلم شيء جديد او تغير من نفسك ويحمسك بعد تنجز
أهدافك وتصير أكثر إصرارا لانك تتأثر باللي حوالينك او بالكتب اللي تقرأها.
الثاني عشر: استشعر بالنجاح وان فشلت
نحاول ونسعى ونجتهد لانجاز امر معين ونتمنى ينجح لكن أحيانا النجاح
مايكون حليفنا والبعض يعتبر هالشي فشل لكن انا اعتقد مو فشل بشكل كامل, بتسأل
كيف!!
بقولك انت ممكن ماحققت النتيجة اللي كنت تتمناها رغم انك خططت وفكرت
واستعديت بشكل حلو وممتاز لكن ما انكتب لك يتم هالامر الحين وبالمحاولة مرة ثانيه
وبطريقة جديده ان شاء الله راح يتحقق. انت هنا فشلت بتحقيق النجاح لكنك نجحت في استخدام
مهاراتك على التخطيط والتفكير وهذا يعني بما انك خططت مره راح تكون قادر على
التخطيط مرة ثانيه بشكل افضل وتتفادئ الأخطاء اللي صارت معك اول مره, انت هنا كسبت
شرف المحاولة وكنت افضل من غيرك اللي جالس وينتظر الحظ يحقق له امنياته. انشتاين
ماوصل لهدفه الا بعد الاف المحاولات الفاشله وماكان يعتبرها فشل, كان يعتبرها فرصة
لتعلم طريقة جديده وحيلة افضل.
الثالث عشر: المكافأه
مثل مافيه انتقاد وعقاب لازم يكون فيه مكافأه وجوائز عشان تحافظ على
تقدمك وسرعة انجازك. كافئ نفسك بما تحب. مثلا تقول لنفسك لو أخذت A+ في المادة الفلانيه (هذا
الهدف) راح اشتري ساعة جديده او مثلا راح اطلع رحلة مع أصحابي او مثلا أشتري غلاف
جديد لجوالي (هذي المكافأه) المكافأه لها أثرها وان كانت صغيرة.
وبكذا قربنا نخلص موضوع التحفيز ويبقى لنا آخر امر وهو أمر مهم جدا عشان كذا قررت
اخليه ببوست مستقل. موعدنا الأسبوع الجاي ان شاء الله.
قراءة ممتعه
0 comments