تحفيز الذات #3
1:56 AM
وأخيرا وصلنا الى اخر امر ممكن يساعدنا على تحفيز الذات وهو امر تكلمت فيه قبل كذا واعطيتكم بعض النصائح اللي ممكن تسوونها وتساعدكم في تعزيز الإيجابية مما يدل على أهمية هالشي.
الحياة فيها السيء وفيها الحلو وممكن البعض يكون الجانب
السيء عنده أكثر من الحلو والعكس وطبعا هالشي يعتمد على الشخص نفسه وعلى نظرته للحياة.
الكل عنده مشاكل والكل عنده هموم الجبال ماتتحملها ولكن نشوفه ماشاء الله مبسوط
ومرتاح وراضي بحياته,ليش؟
الإجابة بسيطة: لانه شخص واثق بالله سبحانه وتعالى وبأن بعد العسر يسر
وان الامر مهما كان صعب راح يفرج. اخذ من الأمور السيئة جانبها الحلو اللي يخليه
يحس بالراحه والطمأنينة وبالتالي ربي راح يرزقه بالفرج ويسهل امره مما يجعله قادر
على مواجهة مشاكله بوجه مبتسم. نصيحة حاول تصاحب الكثير من هالنوعية من الناس
وحاول تجالسهم كثيييييير عشان تنتقل لك العدوى وتصير شخص إيجابي محب للحياة وشاكر
للنعم
اضحك للدنيا تضحك لك. للأسف الاغلب يحب النكد والسلبية ويحب ينشرها
للغير, نظرته للحياة سوداوية وبقوه وكأنه قانط من رحمة الله ومؤمن بأن الله ماكتب
له الا كل شر وسوء وهذا غلط واعتراض على حكم الله وهالشي راح يخلي أموره أسوء
وابشع من قبل. المشكلة مايكتفي بالسلبية لنفسه يحاول ينشرها للغير ودائما عابس
كأنه حالف مايبتسم او يفكر لو ابتسم راح يصير شي بالدنيا, ترا الحياة ماتستاهل كل
هالقنوط. نصيحه ابتعد قد ماتقدر عن هالنوعية من الناس لانهم مثل الفيروس اذا قرب
منك راح يعديك ويتفشى مرض السلبية فيك.
وتذكر بأن الله لايغير مابقوم حتى يغيروا مابأنفسهم. غير من تفكيرك
وحاول شوي شوي تستبدل نظرتك السلبية لاي امر وان كان صغير الى نظرة إيجابية ورضا
واحمد الله عليها واسأل ربي يرزقك خيرها وبأفضل منها. هون على نفسك الأمور عشان
تهون وتصغر بعينك لان عمر الكآبه والحزن ماحل أي مشكلة ابدا.
زعلت وعشت بهم وضيقة, انقطعت عن الناس, حبست نفسك في البيت, تفكر 24
ساعه بشكل سلبي هل تغير شي! انحل الموضوع! استفدت شي! ابدا انت في مكانك ماتغيرت
ولاانحل الموضوع ولااستجد أي شي غير انك خسرت ذاتك وصحتك وكسبت غضب ربك لانك
ماوثقت فيه وقنطت من رحمته وأسأت الظن فيه وقضيت وقتك بشيء ماله أي فايده وهالوقت
راح تحاسب عنه "وعن عمره فيما أفناه"
لاتنسى بأن كل دقيقه تمر ماراح ترجع ابدا وكل دقيقة تمر تخسر فيها
عمرك ووقتك وصحتك وطاقتك فإذا استمريت على هالحال راح تصير شايب بعمر العشرينات او
الثلاثينات<< الكلام للكل بنات وشباب
كل مشكلة ولها حل وكل باب مقفل له مفتاح بس انت صف النية واحسن الظن
وابذل جهدك وراح تلاقي الحل والمفتاح اللي يساعدك في مواجهة أمورك. تميز بالصبر
وان طال الزمن لابد من أن تفرج فالله سبحانه وتعالى مااستجاب دعوة موسى على فرعون
الا بعد 40 سنه ورغم ذلك ما مل موسى من الدعاء وتميز بالصبر والمثابرة بالدعوة
وإنجاز هدفه الين جاه الفرج من رب العالمين.
تميز بحلم وصبر الأنبياء وتفكر في قصصهم ولاتيأس مادام الله معك.
0 comments