تعتبر مرحلة الدراسه مهمة لذالك نحرص تكون اختياراتنا فيها صحيحه، البعض يعاني من عدم القدرة على الاختيار خاصة في المرحلة الثانوية او مابعدها (الجامعة). هذي الفتره بالنسبة للشخص اللي مايعرف يختار ويقرر صعبة جدا ويحس كأنه في دوامه وبالتالي يفقد توازنه ويتشتت. في هالموضوع راح اتكلم ان شاء الله عن بعض الطرق اللي ممكن تساعدك في اختيار تخصصك سواء أيام الثانوي او في الجامعة.
معلومة لازم تخليها في بالك تخصصك في الجامعة يعتمد على تخصصك في الثانوي (علمي، علوم شرعية، اداري) يعني من اول سنة في الثانوي المفروض تكون عارف وش تبي تصير في المستقبل. ولما تختار وش تبي تكون في المستقبل لازم تحط اختيارين كبديل عشان لاسمح الله لو ماصار ودخلت القسم اللي تبيه يكون فيه بديل وبالتالي ماتتشتت وترجع تعاني من جديد.
اولا راح اتكلم عن المرحله الثانويه:
معروف الثانوي فيها ثلاثة اقسام (علمي،علوم شرعيه،اداري) العلمي يشمل الكيمياء والفيزياء والرياضيات وغيرها والشرعي فيه الدراسات الاجتماعيه وعلم النفس والاجتماع واللغه العربيه والاداري يتضمن العلوم الاداريه والعربي، يعني الاقسام متشابه نوعا ما. انت كيف تعرف وش اللي يناسبك.
- اعرف قدراتك العقليه هل انت شخص تميل للفهم او الحفظ او الاثنين كلها. طبعا لاتنسى كل الاقسام تحتاج الفهم والحفظ معا لكن الفهم يغلب على العلمي اكثر من الاقسام الثاني.
- حدد المواد اللي تحبها. اكتب في ورقة كل المواد اللي تحبها وتحس انك تبدع فيها وممتاز فيها وبعد كذا شوف كم عدد المواد العلميه وكم الادبيه اللي يصير عددها اكثر معناتها انت تناسب قسمها اكثر بمعني لو كان عدد الادبيه ٥ والعلميه ٢ معناتها انت تناسب الشرعي والاداري اكثر.
- تأكد من حقيقة ميولك هل انت تحب الاشياء اللي تشغل العقل وتحتاج مهارات تفكير علياء وابتكار(علمي) او الاشياء اللي تربطك بالواقع ومحتواها من واقع حياتك (شرعي،اداري)
- شوف انت وش تبي تصير في المستقبل (حلمك وطموحك) مثلا لو تبي تصير دكتور فلازم تدخل علمي ولو كنت تبي في مؤسسه اداري وهكذا.
- لو مثلا ماوصلت لنتيجه بعد هذي الخطوات قارن بين درجاتك في المواد العلميه والادبيه واللي تكون درجاتها اعلى اختار قسمها.
- اسأل المرشد الاكاديمي او الطلابي في مدرستك او معلم قريب منك واطلب النصيحه منهم.
- استشر اهلك وأصدقائك.
ثانيا راح اتكلم عن الجامعه:
طبعا انت خلال مرحلة الثانوي تكون حددت وعرفت وش تبي تدخل ومثل ماقلت قبل لابد يكون فيه قسم اساسي وقسمين بديله. تخصصك في الجامعه هو اللي راح يحدد مستقبلك والوظيفه اللي بتحصل عليها والحمد الله الان صار فيه مجالات كثيره ومتنوعه للطلاب سواء في التخصصات او الوظائف. ممكن تحتار في كذا تخصص فممكن تتبع الخطوات التاليه:
- حدد ميولك ورغبتك بمعنى آخر حدد وش التخصصات اللي تميل لها مثلا علم نفس او لغات وترجمه وهكذا.
- حدد الاقسام اللي تحس انك بتبدع فيها وراح تحقق حلمك وطموحك.
- اكتب التخصصات اللي تحبها في ورقه.
- شوف ايجابيات وسلبيات كل قسم من حيث عدد المواد والاساتذه والانظمه والمعدل المطلوب وغيرها من الجوانب المهمه بالنسبه لك، طبعا هنا لازم تستعين اولا بموقع الجامعه لان يوضح كل تخصص وش متطلباته ويوضح خطته الدراسيه ثانيا استفد من خبرة الطلاب اللي درسوا هالقسم لان صاحب التجربه هو اللي راح يعطيك المعلومات الصحيحه عن القسم صعوباته والاشياء الحلوه فيه. وخل في بالك القدرات تختلف من شخص لآخر فالشي الصعب عندك ممكن يكون سهل عند غيرك والعكس.
- اسأل اهل الخبره عن الاقسام اللي انت حاب تدخلها وهل ينصحونك فيها او لا. - استشر اهلك وشاورهم وطبعا هذي الخطوه للتعزيز فقط مو عشان تاخذ رايهم وتطنش رغباتك. خل في بالك الاستشاره فقط لتعزيز قرارك الشخصي مو عشان ياخذون القرار نيابة عنك.
- ممكن تاخذ استشاره من أخصائين بهالمجال او تتصفح في النت او اليوتيوب عن تجارب الناس بهالقسم اللي انت حاب تدخله.
لاتنسى تخصصك في الجامعه مرتبط بوظيفتك المستقبليه يعني بالمكانه اللي تحلم توصل لها. نصيحه لاتسمح لاحد يجبرك على تخصص ماتحبه لانك ماراح تنجح فيه مثل ماتتمنى، اختار اللي تحبه وتتمناه واقنع اهلك فيه لو كانوا معارضين.
هذي بعض الخطوات اللي أتمنى تساعدكم في اختيار التخصص بناء على خبرتي البسيطه. لو احد عنده معلومات اضافيه يكتبها في التعليقات تحت.
Note: What's written here is mine. It's the result of my readings and experiences so don't mention it as yours please. Express your admiration of my posts by sharing others but don't forget to mention my name ( kselfhelp.blogspot.com), I'll be grateful for this. Be as you want. Don't imitate others. Don't steal others' work and do your best for yourself.
ملاحظة: كل مايكتب هنا ثمرة قرائتي و حصيلة تجاربي فلا تنسب لنفسك جهدي وتعبي لك حرية التعبير عن اعجابك بما كتب هنا بمشاركته الاخرين و لكن بشرط ذكر المصدر (kselfhelp.blogspot.com) و لك جزيل الشكر والامتنان كن كما تود ان تكون ولا تصبح مقلدا يسرق جهد الاخرين !ابذل القليل من الجهد
