الجوانب التي يجب الاهتمام بها للوصول الى الاستقرار النفسي
8:35 AM
الجوانب اللي لازم تهتم فيها لان لما تهتم فيها راح توصل للاستقرار النفسي والراحة والرضى عن الذات وتعيش حياة حلوه وهاديه تتمناها. لابد تهتم بعدد من الجوانب وتشبعها بشكل سليم وصحيح وهالجوانب لازم تاخذها بعين الاعتبار لما تختار هدفك والجوانب كالتالي:
الجانب الروحي
النفسي
الاجتماعي
المعرفي
العلمي
الشخصي
الصحي
راح اتكلم عن هالجوانب وكيف ممكن انميها.
أولا: الجانب الروحي:
والمقصود فيه العبادات وذكر الله وهو جانب مهم جدا واساسي. اذا اسسته صح راح تعيش مرتاح ومبسوط بإذن الله. كيف ممكن انمي هذا الجانب؟!
طور الاشياء القديمه اللي كنت تسويها واضف اشياء جديده ماكنت تسويها. راح اعطيكم بعض الاقتراحات في هذا الجانب
- الحفاظ على الصلاة في اوقاتها
- القيام بصلاة الليل والشفع والوتر
- حدد لك ورد يومي من القران لقراءته(جزء او نص جزء)
- حدد لك ورد يومي من الاذكار(استغفر الله واتوب اليه،سبحان الله وبحمده، الصلاة ع الرسول،التكبير،حسبنا الله ونعم الوكيل وغيرها من الاذكار المحببه لنفسك)
- حافظ على اذكار الصباح والمساء والنوم
- ابدأ بحفظ أجزاء من القران (حدد السور اللي تبي تحفظها بعدين ابدأ بسورة سوره عن طريق حفظ ٥ ايات يوميا ومراجعتها في اي وقت تحب وممكن تستغل اوقات الانتظار او المشوار في السياره استمع للسور فهي تساعدك ع الحفظ اكثر)
- حافظ على قراءة سورة البقره ويس والواقعه والملك(الملك قبل النوم)>حدد سور مفضله لنفسك ولها فضل معين واقرأها يوميا(كل السور لها فضل)
هذي بعض الامور اللي ممكن نطورها او نضيفها بحياتنا عشان نصير اقرب الى الله ونستقر نفسيا ونحس بالطمأنينه. لما تبدأ بهالشي راح تحس بالتغير في شعورك وحياتك. لاتتردد في استغلال اي لحظه لذكر الله (رطب لسانك بذكرك)
ولان للاسف الاغلب يقضي وقته ع الاجهزه ممكن تستغل هالشي لصالحك،كيف؟!
- ممكن تحمل برنامج الاستغفار في جوالك بحيث يذكرك بذكر الله حتى لو كنت مشغول لان يقول الاذكار بالصوت.
- او تكتب ملاحظه بالاذكار اللي تحبها وتخليها خلفيه لجوالك.
- او تحط تنبيه بالاذكار كل نص ساعه بحيث لما يبدأ المنبه تشوف الاذكار وتقرأها.
ثانيا: الجانب النفسي:
هالجانب يتمثل في ثقتك في نفسك وتقديرك لذاتك يكفي تكون شخص مميز في نظرك لان غاية الناس لاتدرك. حاول ارضاء نفسك اولا بما يرضي خالقك ولاتلتفت لكلام الناس ابدا الا اذا كان كلامهم حقيقه ومنطقي. ممكن تستشير البعض اللي تثق في آرائهم في بعض الامور الخاصة فيك اذا كنت محتار. (لمعلومات أكثر http://kselfhelp.blogspot.com/2015/05/blog-post_21.html
اتجاهاتك الفكريه واللي اقصد فيها طريقة نظرتك للامور وتحليلها وطريقة تعاملك معها. هذي الاتجاهات عادة تكون مقيده بالعرف والدين لذالك حاول ماترتكب شي غلط يخالف الشرع . هذي الاتجاهات تتكون بحسب البيئة اللي تعيش فيها وتتأثر بقوه بمحيطك لذالك لاتكون منطوي ومتحجر وماتحاول تغيرها لو كانت تحتاج التغيير او التطوير لذالك اطلع ع افكار الغير من خلال القراءة او المحادثات والنقاشات لان هذا يعطيك مجال تصحح بعض الاخطاء لو عندك او تكتسب الخبره اللي تأهلك لمواجهة مختلف الامور. ولاتنسى افكارك غير افكار اللي حولك ف مو شرط يتفقون معك لابد يكون فيه شوية اختلاف فتقبله بصدر رحب.
تفكيرك الايجابي وتفائلك وهذا شي مهم جدا لان هالشعور يثبت انك شخص واثق بربك وراضي بحكمه وواثق ايضا ان ربي مايختار لك الا كل شي حلو. ابتسم وتفائل وراح تبتسم لك الحياة وتحلو بعينك وتتسهل امورك لان ربي بيرزقك ع حسب ظنك فيه.
غير دائما مشاعرك السلبية الى ايجابيه (لمعلومات اكثر http://kselfhelp.blogspot.com/2015/06/blog-post.html)
ثالثا: الجانب الصحي:
والكل يعرف وش اقصد فيه (اكلك وصحة جسمك). حاول تغير عادات اكلك الغير صحيه الى اكل صحي وبشكل تدريجي لان مافي شي يصير في يوم وليله. كثر من اكل الفواكه والخضار واشرب كثير من المويه والعصيرات الطبيعيه.
مارس الرياضه بمختلف انواعها وابسطها المشي. مارس الرياضه لو ٣ ايام في الاسبوع لمدة ساعتين او يوميا لمدة ربع او نص ساعه عادي تنفع. وخل في بالك ان الرياضه احد الطرق الفعاله للتخلص من الملل والمشاعر السلبية وتعتبر محفز جيد عشان تجدد نشاطك وتشحن عقلك بالافكار الايجابيه. وخل في بالك ان الرياضه مو بس لخسارة الوزن يعني حتى لو كنت نحيف مره مارس الرياضه لانها تساعد ايضا في الحفاظ ع لياقة جسمك.
لاتستهينون في اي لحظه تستغلونها في الحركه لانها تساعد ع طرد الطاقه السلبية.
رابعا:الجانب الاجتماعي:
والمقصود فيه علاقتك مع الناس اللي حولك اهلك واصحابك وزملاء العمل وغيرهم. خل علاقتك فيهم تتميز بالتسامح والعفو. اغفر الزلات واعف عما سلف. لاتكون شخص حقود وحاسد وتمسك بقلبك حاسبهم ع اخطائهم بنفس اللحظه وانساها لاتخليها بقلبك لانك انت المتضرر الوحيد تتعب نفسيا. خلك مبتسم دائما في وجه اي شخص تقابله حتى لو ماتعرفه"الابتسامه في وجه اخيك صدقه". ساعد الغير باللي تقدر عليه لو برفع المعنويات بالكلام فالمشاركه حلوه ولها تأثير ايجابي كبير حتى لو كانت مشاركه بشي بسيط(ابتسامه او كلام حلو مثلا)
حاول دائما تصحح عيوبك في تعاملك مع اللي حولك وتكون افضل عشان تكسب راحتك وسعادتهم. خلك مبادر دائما بالفعل الحلو والكلمة الطيبه وتذكر ان الحياة فانية وراح تندم ع اي تصرف غلط تسويه حتى لو كان الطرف الثاني يستاهل وممكن تندم لانك ماتصرفت معه بشكل زين>اذا فات الفوت ماينفع الصوت. استغل الفرص دائما لتطوير علاقاتك مع اللي حولك بشكل حلو وايجابي. حاول دائما تبني علاقات ع اساس متين من الحب والمغفره ولما تكون نفسيتك تمام وعلاقتك مع الاخرين كويسه راح تصير صحتك ممتازه
خامسا:الجانب المعرفي:
والمقصود فيه تطوير محصولك الثقافي والمعرفي بمعنى انك تسعى لمعرفة كل شي جديد وتبحث عنه وتاخذ المعلومات من مصدرها الموثوق، حاول تكون ملم بكل الاشياء اللي تصير حولك عن طريق القراءه والاطلاع وسؤال ذوي الخبره، مثلا لو كنت مع ناس وتناقشوا في موضوع انت ماعندك خلفيه عنه حاول تروح تبحث عن هالشي وتنمي ثقافتك فيه عشان لما ينفتح النقاش مره ثانيه تكون عارف عن ايش تتكلم وبكذا تكون ثقفت نفسك وكسبت معلومات جديده واثبت للناس انك شخص فاهم. طبعا هالجانب والجانب العلمي مردودهم عليك اولا ثم ع الناس. يعني الفائده لك وللي حولك. لاتبخل بأي شي تعرفه حاول تشارك الاشياء اللي تعرفها منها تفيد الناس ومنها تثبتها في عقلك. كن شخص مثقف وواعي لكل شي يصير. لاتكون محصور المعلومات، وسع آفاق معرفتك.
سادسا:الجانب العلمي
ومثل مو واضح من العنوان يهتم بمستواك العلمي والشهادات اللي حصلت عليها. لاتكتفي باللي معك حاول تسعى لتحصل ع افضل الشهادات واكثرها اعترافا بمعنى لاتكتفي بدراسة الثانوي ولا الجامعه حاول تكمل لتحصل ع الماستر والدكتوراه وغيرها من الشهادات المعترفه لان في وقتنا ع حسب شهادتك تكون مكانتك. والشهاده احد اسباب الحصول ع وظيفه حلوه ومناسبه. العلم ماله سن محدد ولا مكان معين حاول ماتنقطع عن التعلم ابدا وخذ العلم من كل مكان.
هذي الجانبين تحدد هويتك واهتماماتك وتساعدك في توضيح أهدافك.
سابعا:الجانب الشخصي:
وهالجانب يتعلق برغباتك الشخصيه وطموحاتك مثلا رغبتك في تعلم لغه او حرفه جديده او ممارسة هواية مختلفه(لمعلومات اكثر http://kselfhelp.blogspot.com/2015/10/blog-post_23.html ضروري تقرونه لان بالتفصيل وانا هنا اختصر)
في هذا الجانب لازم تكون صادق وصريح مع نفسك عشان تعرف وش الاشياء اللي تحبها وتتمنى فعلا تسويها في حياتك. اكتب كل الاشياء اللي تخطر ع بالك بشرط تكون واقعيه وماتخالف الشرع وابدأ حقق الاشياء اللي كتبتها شوي شوي يعني مثلا حدد كل سنه شغله او شغلتين تنجزها من هالاشياء اللي كتبتها. طبعا التنفيذ يكون بالتخطيط (لمعلومات اكثر http://kselfhelp.blogspot.com/2015/10/blog-post.html)
كرس كل جهودك واهتماماتك لهذا الجانب لانك المستفيد الوحيد ولاتضيع عمرك في خدمة الغير وتنسى نفسك "ولنفسك عليك حق" خصص لك وقت لذاتك لو ساعه في اليوم. عامل نفسك مثل ماتعامل اللي حولك وتواصل معها واعرف احتياجاتك ولبيها عشان ماتحس بالضياع والتشتت.
دائما كن صادق مع نفسك وصريح عشان تكسب راحة البال والطمأنينه
ملاحظة: كل مايكتب هنا ثمرة قرائتي و حصيلة تجاربي فلا تنسب لنفسك جهدي وتعبي لك حرية التعبير عن اعجابك بما كتب هنا بمشاركته الاخرين و لكن بشرط ذكر المصدر (kselfhelp.blogspot.com) و لك جزيل الشكر والامتنان كن كما تود ان تكون ولا تصبح مقلدا يسرق جهد الاخرين !ابذل القليل من الجهد
0 comments