البعض يتمنى يعيش الحياة اللي يتمناها ولكن للأسف الخجل يمنعه من هالشي. اغلب الناس تعاني من الخجل والمشكله الخوف والتردد اللي تصاحب هالخجل. موضوعي ان شاء الله راح يكون الخطوه الاولى لكل شخص يعاني من هالمشكله راح اتكلم عن بعض الأمور اللي ممكن تساعدك في التخلص من هالشي.
قبل ماابدأ أتكلم عن الطرق اللي بتساعدك في التخلص من هذي المشكله بإذن الله لازم تخلي في بالك انو مافي شي بهالدنيا يستحق يخليك تخجل لان حالك حال الناس اللي حولك ومافي فرق بينكم. ولازم بعد تفرق بين الخجل والحياء المحبب وعشان تتخلص من الخجل الغير محبب راح تحتاج لفتره من الوقت ولأكثر من محاوله لان مافي شي يصير في يوم وليله لذالك لازم تتحلى بالصبر والمثابرة وقوة العزيمة.
الان راح اذكر بعض الامور اللي ممكن تساعدك في انك تترك الخجل:
- الاعتراف:
اعترافك بأنك تعاني من مشكله في حد ذاته علاج لان اعترافك دليل انك واعي للوضع اللي انت فيه وحاب تغيره.
- النيه واتخاذ القرار بالتغير:
بعد ماتعترف انك تعاني من هالمشكله يجي وقت اتخاذ القرار بأنك لازم تترك الخجل لانه قيدك ومنعك من انك تنجز أحلامك وتعيش طبيعي مثل اللي حولك. وتأكد طالما عندك نيه تترك هالشي راح تتركه بإذن الله.
- معرفة الموقف المسبب للخجل:
بمعنى اعرف وش المواقف اللي تحس فيها بخجل مثلا لما تعبر عن مشاعرك او لما يكون فيه عزيمه وجمعة ناس او لما تلقي شعر او تقرأ قصه قدام الحضور وغيرها من المواقف اللي ممكن تسبب لك خجل.
- تحديد السبب:
لما تحس بالخجل وش اول شي يخطر في بالك بمعنى وش السبب اللي يخليك تخجل مثلا نظرة الناس لك او تخاف من فكرة الناس عنك او مثلا لانك مو واثق في كلامك او لبسك وغيرها من الاسباب اللي تسبب لك هالشعور.
- وضع خطه للتخلص من الخجل:
بما انك عرفت الموقف اللي يسبب لك هالشعور وعرفت السبب تقدر الحين تسوي لك خطه تساعدك على التخلص من هذا الشعور. الخطه لازم يكون لها وقت محدد ووسائل معينه وخطوات مناسبه لقدراتك وامكانياتك. هذي الخطه راح تشمل على أنشطه من شأنها تساعدك في التخلص من الخجل ومن ضمنها:
1- اكتساب مهارات التواصل:
لازم تتعلم كيف تتعامل مع الناس وكيف تتكلم معهم عن طريق دورات تدريبيه او من فيديوات اليوتيوب او قراءة كتب في هذا المجال. اسأل ناس متخصصة بهالشي او راقب تصرفات اللي حولك وتعلم منها.
2- المشاركة في الأنشطة الاجتماعية:
حاول تستغل الفرصه في انك تشارك في أي نشاط اجتماعي يناسب قدراتك ومهاراتك وخاصة الأعمال التطوعيه لانها تساعدك في انك تختلط بالناس وتنسى شعور الخجل لانك تكون مشغول بمساعدة الاخرين.
3- تعزيز الثقة بالنفس:
الثقه أهم شي لان لما تكون واثق من نفسك تأكد انك بتعيش مرتاح. عزز ثقتك بنفسك دائما لانها سلاحك في هذي الحياة. انت واحد من عباد الله ولك الحق في انك تعيش مثل ماتحب بما يرضي الله ومافي احد له الحق في انه يضيق عليك او يخرب عيشتك، مثل ما الناس تعيش حياتها على كيفها انت بعد يحق لك تعيش على كيفك بدون خوف او قلق او خجل من ناس مثلك. تأكد ان هالناس ماراح تقطع راسك او تمنع عنك مصروفك عشان تخجل منهم او توتر لما تجلس معهم حتى لو كان شخص مكانته الاجتماعيه اعلى منك. كلكم مثل بعض ومصيركم واحد.
- تخيل النتيجه:
دائما أقول لكم عشان ماتفقدون الحماس في اي شي تسونه تخيلوا النتيجه قبل تصير يعني تخيل حياتك وانت ماتخجل وتتكلم مع الناس طبيعي بدون خوف، اكيد راح تحس بشعور حلو وتتمنى يصير هالشي اليوم قبل بكره وتعيش مرتاح.
- التفاؤل:
كن متفائل دائما وواثق بأن ربي راح يحقق مرادك لانك بجد حاب تغير هالطبع. لما تكون متفائل ومحسن الظن بربك تأكد بأنه ماراح يخيب ظنك.
- الاختلاط بالناس:
حاول قد ماتقدر تبدأ تختلط بالناس شوي شوي ابدأ بالاختلاط بأقاربك والاشخاص اللي تحسهم خجولين مثلك، كيف ممكن اعرف الشخص الخجول؟! راح تلاحظ انه مايتكلم كثير ويحب يجلس بعيد شوي عن الناس.
ابدأ تكلم مع الناس الخجوله لانكم مشتركين في هالنقطه راح تسولفون وانتوا مرتاحين ومافي ضغط عليك ومع الوقت راح توسع الدائره شوي وتتكلم مع اي شخص. في البدايه راح تحس بصعوبه وشعور خوف وتوتر وممكن تعرق من شدة التوتر لكن عادي اصبر واستمر بالمحاولة لان مع الوقت راح يتغير هالشعور لشعور راحه ويصير الوضع طبيعي.
- عبر عن مشاعرك:
لاتكتم بخاطرك اي شي تحس فيه، عبر دائما عن الأشياء اللي داخلك سواء كان شعورك اتجاه شخص او موقفك اتجاه تصرف صار لك او صار قدامك لاتسكت تكلم عادي وقول وش تحس فيه لان الكلام من حق الكل.
- طلب المساعده من المقربين:
هذي خطوه اتوقع راح تحتاجها في مرحلة ما من العلاج، ليش؟ لان أحيانا راح تحس انك ماتقدر لحالك وحاب تشارك أحد بالشي اللي تسويه وتقوله عن استيائك من الخجل، ومثل مو معروف بالمشاركه تصير الامور افضل واسهل لذالك حاول تشارك خطة علاجك شخص مقرب منك حيل سواء أخ او اخت او صديق او أب او أم لان لما تحس ان فيه احد يحس بوضعك راح تكون مطمن ومستانس. وجودهم راح يشجعك لما تفقد العزيمة. راح يحفزونك ويشجعونك دائما على الاستمرار في الخطه وكسر حاجز الخجل.
وفي النهاية لاتنسى تصبر وتحاول اكثر من مره وكل مره جرب طريقة جديده الين توصل للنتيجه اللي تتمناها. تكلم مع نفسك دائما بكلام إيجابي يعزز ثقتك بنفسك وبأنك شخص قادر تتخلص من الخجل وبأن ربي ماراح يخيب ظنك لكن انتبه مو تصير شخص وقح لان اللي اقصده هنا هو الخجل الغير محبب الخجل اللي يسبب لك خوف وقلق وتوتر ويخليك تتلعثم في كلامك. اتصف بالحياء وليس بالخجل. ولاتنسى ان الخجل يسبب العزلة عن الناس وبالتالي الكآبة والحزن والنظرة السوداوية للحياة والقنوط من رحمة الله والأفكار السلبية.
