البداية لإتخاذ القرار المناسب
10:38 PM
البعض منا ممكن يواجه صعوبة في اتخاذ القرارات وان كانت بسيطة, اذا تم
اختياره لاتخاذ قرار يحس بالتوتر وبالحمل الثقيل رغم ان الامر ابسط مما يتخيل
وهالشي ممكن يكون بسبب قلة ثقه بقدراته او مايحب المسئولية او ممكن يكون شخص مشوش
وغير منظم وبالتالي يحس الدنيا من حوله معفوسه وماتساعده في اتخاذ أي قرار.
موضوعنا اليوم راح يكون البداية البسيطة اللي ممكن تساعدنا في توضيح الصورة للوصول الى قرار مناسب لك وللي حولك ولكن قبل ما أبدأ لازم نعرف وش اللي يمنعنا من اتخاذ القرار المناسب او
التفكير بشكل جيد<<لابد من معرفة سبب أي مشكله نعاني منها حتى نتخلص منها بشكل نهائي.
تختلف الأسباب من شخص لآخر وهنا راح اذكر بعض الاسباب اللي يعاني منها الاغلبية:
عدم الثقة بالنفس والقدرة على تحمل المسئولية:
الشخص المعتمد في كل أمورة على الاخرين في اتخاذ القرارت سواء على
الام او الاب او الأخ يصير شخص قليل الثقه بنفسه ويحس انه ماينفع لشي أبدا بالتالي
اذا تعرض لاي موقف بيسيطر عليه الخوف والقلقل والتوتر لقلة خبرته بهالشي والنتيجه
راح يتوصل الى قرار خاطئ. بعض الأهالي من فرط الاهتمام بأطفالهم يعفونهم من جميع
المسئوليات ويتولون مسئولية اختيار حياتهم حتى في أبسط الأمور كإختيار اللبس
المناسب او اللون المفضل لديهم او الوجبة اللي يحبونها وهالشي يأثر بشكل سلبي جدا.
عدم توفر التغذية الراجعة المناسبه:
كلنا نعاني من هالسبب انو مافي شخص يصحح لنا أو ينصحنا وقت الخطأ
وتوضيح الأمور لأخذ العظة والعبرة بالتالي
يصير الشخص مشوش بما يخص القيم لانه مايعرف وش الصح وش الخطأ او وش الأشياء اللي
تناسب العادات او تخالفها, اللي يقبله المجتمع او يرفضة. يعيش الشخص بداومة
الاحكام والعادات ومبادئة الشخصية.
أهداف غير واضحة:
من اهم الأمور اللي تساعدك في الحصول على حياة هادئه وتكون راضي عنها
هو انك تعرف وش تبي, وش الأشياء اللي تتمنى تصير واقع بشرط تكون هالامور واضحة جدا
ومعقولة وقابلة للتحقيق ومحدده بزمن معين مناسب لها. يعني مو نختار هدف والزمن
طويل بالنسبه له او قصير مثلا: لو كنت ناوي اشتري لي جهاز جديد خلال عشر سنوات. هالهدف خطأ لسببين الأول طول الفتره الزمنية
وبالتالي راح تحس بالملل والإحباط والهدف مايستاهل كل هالوقت لان تقدر بهالعشر
سنوات تنجز أشياء كثيره وأهم من هالجهاز اللي بيفقد قيمته بعد مرور هالسنوات. السبب الثاني الهدف غير واضح لان نوع الجهاز ومميزاته مو واضح ابدا يعني مو جوال او كمبيوتر
او ممكن أي جهاز.
الخوف من الفشل:
الخوف مما سيحصل قبل حدوثه اكبر خطأ ترتكبه في حق نفسك. الحرص حلو لكن
بحدود مو لدرجة مااسوي شي بحياتي لاني أخاف من الفشل. اتخذ من كل محاولة فاشلة سبب
يشجعك على ابتكار طريقة أفضل مناسبه للمحاولة مرة ثانيه.
عرفنا الأسباب الحين راح نحاول نعالج هالاسباب بما يلي:
1- درب نفسك على تحمل المسئولية وتنمية الثقه بنفسك من خلال المواقف.
حاول تعيش مواقف مختلفة وتتولى انت زمام الأمور فيها وماتسمح لأحد بالتدخل مثلا
كإختيار تخصصك الجامعي انت شخص متعلم وعارف وش ميولك وقدراتك والمواد اللي تحبها
وتتمنى تتخصص فيها فلا تسمح لأحد يختار نيابة عنك ابدا ممكن تستشيرهم وتاخذ رايهم
في التخصص اللي انت تبيه كنصيحه مو كإختيار لك.
2- لما تسوي أي أمر حاول تعرف آراء اللي حولك فيه عشان تعرف اذا صح او
خطأ. وهالشي مايعني تستفسر في كل شغله تسويها , استفسر في الأمور اللي تحس انها
مهمه ولازم رأي كم شخص فيها. اسأل واستفسر دائما عن أي امر ماتعرفه او أي موقف
عرفت عنه ومافهمته.
3- حدد اهدافك بشكل واضح وصريح بفترة زمنية محدده مناسبة لانجازه مثلا:
أبي أصير معلم لغة انجليزية متميز في أدائي ومتعاون مع زملائي خلال سنه. بهالشكل
تصير عارف وش تبي وتركز عليه راح تشتغل على نفسك وتطور من طريقة تعليمك وتبتكر طرق
جديده من خلال الاطلاع والقراءه وبعد بتسعى تساعد زملائك بالعمل في أبسط الأمور لتصل
الى مرادك.
4- ذكر نفسك دائما انو مافي شخص انولد ناجح. الكل بذل جهده واشتغل صح
عشان يوصل للي وصل له, فشل اكثر من مره لكن ما مل وحاول أكثر الين وصل للي يبيه.
لاتخاف من الفشل مادمت دارس الموضوع صح ومحدد الطريقة المناسبة له.
عزيزي القارئ ابحث عن السبب الاساسي اللي يمنعك من اتخاذ القرار الصحيح وحاول تعالجه بالطريقة المناسبة. مارس اختيار القرار لتكسب الخبرة اللازمة للاستمرار.
3 comments
This comment has been removed by a blog administrator.
ReplyDeleteدائما ممبدعه واثبتي الابداع في هذا البوست :)
ReplyDeleteشهادة أعتز فيها
Deleteتواجدك يسعدني