الخطوة الاولى لأجمع ثروتي
4:41 AM
اغلب الأشخاص يعاني من مشاكل مالية وذالك بسبب عدم قدرته على الصرف بطريقة
صحيحه. وبسبب هذي المشاكل قد يفقد توازنه وتركيزه بالتالي راح يضيع وقته في
التفكير السلبي اللي بيدمره اكثر. احيانا لما نستلم الراتب او يجينا اي مبلغ يطير
بلمح البصر وماندري وش السبب ووين راح ونقضي باقي الشهر يد ورا ويد قدام.
لازم يكون عندك وعي تام بأهمية الفلوس في حياتك ومدى تأثيرها على
نفسيتك وعلى حياتك اليومية وبالتالي على نسبة انجازك. مبدئيا فيه شوية مبادئ لازم
تؤمن فيها عشان تقدر تخطط بشكل صحيح لاستغلال المال بشكل يرفهك ويسعدك:
- الفلوس ماتجي من فراغ. لازم تشتغل وتستغل جميع الفرص الحلال واللي
تناسب قدراتك عشان تملكه.
- تذكر إنك تعبت وشقيت الين استحقيت هذا المبلغ بالتالي مايستاهل تضيعه
على أشياء تافهه.ولو كان الاهل اللي يعطونك تذكر انهم تعبوا عشان يعطونك هالمبلغ فتقديرا لجهدهم اصرفة بشكل جيد.
- مو كل شي نبيه لازم نحصل عليه. لازم تتعلم التنازل عن الأشياء الجانبية
اللي لو تركتها ماراح تأثر عليك. حلو تمتع نفسك بشي تحبه ولكن مو دائما يعني على
حسب امكانياتك.
- ثق بأنك تقدر توفر من راتبك شهريا مبلغ بسيط لما يتجمع مع بعض يصير
مبلغ كبير. لاتستهين بأي ريال تدخره لان مع الوقت يتجمع ريال مع الريال ويصيرون
مية. بمعنى لما تصرف مية ويبقى منها ريالات ومااحتجتها حطها بحصالة خاصة فيها
وممكن بعدين تستخدمها كصدقة او تشتري فيها شي تحتاجة.
- اصرف دائما بقدر حاجتك واترك البذح والهياط بهدف اني انا الشخص اللي
عندي فلوس ومااهتم لها لان مصيرك يوم من الأيام تحتاج لها طال الزمن او قصر<< خبي فلسك
في اليوم الابيض ليومك الأسود.
- لاتقارن نفسك بالغير وتحاول تملك أشياء لمجرد انك تصير مثلهم مثلا لما نزل ايفون 7 الكل راح يشترية على اساس انه جهاز جديد والكل هب فيه, اذا امكاناتك ماتسمح بإمكانك ماتشترية وتكتفي بجهازك اللي معك مادام تقدر ترسل منه وتتصب فيه وتستخدمه بشكل طبيعي ولما ينزل سعره تشترية . كن مميز ولاتقلد الغير لمجرد اني اتخلص من شعور النقص, ولايكون تفكيرك محدود بهالشكل.
- فيه التزامات ثابتة مثل الايجار والاقساط تنتهي بعد فترة معينة لذالك
راح يكون تصرفك في الباقي من راتبك. حاول دائما تبحث عن البديل مثلا عن شقة
ايجارها ارخص والاقساط لاتاخذ قرض زيادة.
- آمن بأن الصدقة تطرح البركة في فلوسك مهما كانت قليلة.
- لازم تحدد مبلغ تستقطعه شهريا لو 200 ريال. هذا المبلغ ماتستخدمة ابدا
ابدا, اعتبره مو موجود<<ممكن تحطها في حساب مجمد في البنك او في حصالة ماتنفتح الا اذا كسرتها
او ممكن تخبيها عند شخص تثق فيه ويرفض يعطيك اياها<<نذاله
ههههه
أحد الطرق اللي ممكن تساعدك في السيطرة على فلوسك وتكون تحت تصرفك هو
عمل جدول خاص بمصروفاتك. طبعا بهالجدول راح تكتب كل الالتزامات والاحتياجات اللي
تصرف فيها فلوسك مثلا: الأقساط والبقاله والايجار والملابس وأدوات مدرسية/جامعية
او كتب للقراءة وغيرها من الاحتياجات اللي تحتاجها. بالكتابة راح تصير مصروفاتك
واقع تحس فيه بعكس لما تصرف بدون ماتكتب راح تصرفها في أشياء تافهه وبعدين تنسى وش
صرفتها فيه.
المطلوب:
- تخصص لك دفتر صغير خاص بمصروفاتك فقط.
- تكتب مصروفاتك بشكل شهري.
- في كل صفحة راح تكتب راتب شهر ......<<تكتب
اسم الشهر اللي انت تخطط له.
- تسوي جدول فيه اربع خانات وحدة تتضمن الالتزامات ويندرج تحتها جميع
احتياجاتك بالاسم. والخانة الثانية للمبلغ المحدد حسب الحاجة. والثالثة للمبلغ
المصروف راح تكتب فيه كم صرفت. والاخيرة راح تكتب فيها المبلغ المتوفر يعني أي مبلغ
يزيد من أي احتياج راح تكتب المبلغ اللي وفرته منه قدامة في هذي الخانة. شوفوا
الصورة تحت :)
- خصص صفحة للمصروفات المفاجئة اللي ماكنت مخطط لها مثلا لما تشتري هدية
لصاحبك او تزور شخص مريض وغيرها من المناسبات اللي تصير أحيانا.
- لاتنسى تضيف في خانة الالتزامات "الصدقه" حدد لها مبلغ ولو كان بسيط. تقدر تخصص من 10 ريال الى 100
ريال على حسب ماتحب وتصدق فيها اما بشكل فلوس او ممكن تشتري كرتون موية وتوزعة على
أي شخص يشتغل تحت الشمس سواء في البناء او المحطة او أي مكان تحس يحتاجون اللي
يشتغلون فيه لموية او اشتري وجبات ووزعها, يعني تصرف فيها بالشكل اللي يريحك. تصدق
على حسب السيولة كل شهر او كل شهرين ولكن لاتنساها.
- بعد ماتسوي صفحة المصروفات الشهرية ومصروفات المناسبات المفاجئة حدد
صفحة تكتب فيها ادق تفاصيل مصروفاتك المالية بمعنى انو كل مره تصرف فيها شيء روح
سجلها في هذي الصفحة, ليش!! لان كل نهاية شهر راح تشوف انت وش صرفت فلوسك فيه وتشوف
هل انت التزمت بالمبلغ المحدد او لا وتكتشف وش صرفت فلوسك فيه وهالشي راح يساعدك
في معرفة الأشياء اللي مالها داعي وبالتالي تتركها في الشهور الجاية , وتعرف الأشياء
الأساسية وتركز عليها وتحدد مبلغها بالشكل المناسب, وممكن يساعدك بعد في ابتكار
طرق بديلة للتوفير.
الهدف من هذا الجدول انك تحدد مبلغ محدد لكل احتياج بحيث انك ماتتجاوز
هذا المبلغ ابدا مهما صار. انت فكر في احتياجاتك الغير ثابته(كالايجار والاقساط)
وخمن كم يبي لك فيها. وثق تماما مع مرور الوقت راح يصير عندك وعي اكثر وراح حريص و
تتصرف بتلقائية .
1 comments
كلامك جميل جدا بس احس السيطرة عالمال زي السيطرة عالاكل
ReplyDeleteكلهم سهلين بالكلام وصعبين بالتطبيق
اعاني من الاثنين
لكن بنبدا نطبق الدفتر فكرتك جميلة
الف شكر