العمل التطوعي
2:17 AM
البعض منا ممكن يعيش في فترة من
فترات حياته حالة ضياع وتشتت، ما يعرف وش طموحه او هواياته لذالك اليوم ان شاء
الله راح اتكلم عن أحد أفضل الطرق اللي ممكن تساعدك في معرفة قدراتك ومهاراتك وهي
العمل التطوعي. العمل التطوعي بمختلف مجالاته ممكن يكون هو الخطوة الاولى عشان
تعرف ميولك، وش تحب وش تكره، وش اللي تتمناه جد. مهما كان نوع هذا العمل لا تستهين
فيه وان كان بسيط جدا مثلا مساعدة شخص مسن في حمل أغراضه، ليش؟!
لعدة أسباب:
أولا: انت لما تساعد الغير
بدافع اكتساب الاجر راح تحس براحه عظيمه وتحس بأنك شخص مهم وفعال في مجتمعك. اقرب مثال لما تساعد مدبرة المنزل في حمل الاغراض وتدخلها معها البيت تحس انك سويت شي كبير وتحس بقوتك فما بالك لما تسوي عمل يسعد الكثير من حولك!
لما
تشوف ابتسامة اللي حولك راح تبتسم من داخلك وبالتالي هالشي راح ينعكس على تصرفاتك
ونظرتك للحياة، راح تصير أكثر تفاؤل وسعادة والامل عندك راح يزيد. في كل عمل تطوعي تشارك فيه راح تكتشف ميولك
وقدراتك ومهاراتك الخفية تدريجيا وبالتالي راح تكون قادر على الاستقرار واختيار الطريق اللي
يناسبك وترسم طريق حياتك بشكل واضح وهالشي راح يضمن استقرارك النفسي.
ثانيا: لما تسوي عمل خالص لوجه
الله راح تقوى علاقتك بربك ولما تقوى علاقتك بربك راح تحس بطعم الحياة والراحة والطمأنينه وتشكر ربك على نعمة الصحة والحيل
والقوة اللي وهبها لك. وبسبب لذة الراحة اللي تحسها بعد كل عمل تنهيه راح تكثر من
هذي الاعمال وتشعر بالامتنان لله. وتذكر لما تقوى علاقتك بربك يزيد اطمئنانك
وتركيزك وهدوئك.
ثالثا: لما تساعد اللي حولك راح
تكون سبب في سعادتهم وبالتالي تكسب دعاويهم الحلوه وهالشي راح يسهل امورك بإذن
الله. ثق تماما لما تقدم شيء حلو يسعدك ويسعد اللي حولك راح تجني ثمرة هالشي طال
الزمن او قصر. لذالك قدم الجميل دائما ترتاح ولا تنتظر النتيجة مباشرة لان ربي
ممكن كاتبها لك في وقت أفضل.
رابعا: مساعدة الاخرين احد
اسباب تقوية العلاقات بين افراد المجتمع وأحد أسباب وحدته وترابطه لان لما تساعد
غيرك راح تتولد مشاعر الحب والاحترام والتقدير، وانت لما تشوف هالشي الجميل راح ينعكس
بشكل إيجابي على نفسيتك وبالتالي تصرفاتك وراح يساعدك في الوصول الى الراحة
النفسية والشعور بلذة الإنجاز.
فيه الكثير من الأمثله على العمل التطوعي منها:
- مساعدة شخص لايستطيع الرؤية على عبور الطريق أو مساعدة شخص في دفع
كرسيه المتحرك.
- مساعدة الكبار في السن في حمل أغراضهم او حتى القيام بأعمالهم
المنزلية.
- تعليم الأطفال او كبار السن القراءة والكتابة.
- المساعدة في إحياء أرض ميته بالنباتات المختلفة.
- تنظيف الأماكن العامة.
- مساعدة موظف النظافة اللي مع الأسف الكثير يستهينون فيه. انت أساسا لما
تشيل أغراضك بعدك وتحطها في مكانها المخصص لها هذي مساعدة كبيره له بشكل ما تتخيل
هذا غير الاجر اللي راح تكسبه. انت لما ترمي اللي بعدك على بالك هو مايدعي عليك
ومايتحسب! أكيد تحسب على مسبب هذي الكارثه في يوم من الأيام لانه تعب من التنظيف
سواء في الشارع او المدارس او المباني او أي مكان. لاتنسى ان الله يراقبك وراح
يبتليك في يوم من الأيام لان الله يمهل ولايهمل.
- تزيين الأماكن العامة او أي مبنى.
- توزيع موية على الناس اللي تشتغل تحت الشمس.
- مساعدة مدبرة المنزل في تنظيف البيت.
وغيرها من الاعمال اللي ممكن تسويها وتكسب الاجر من وراها. ابحث عن أي
عمل متوفر في مجتمعك وبيئتك حتى لو ماكان فيه أعمال تطوعية كن انت صاحب الفكرة وأول
من يبدأ بها. كل هالاعمال الخيرية راح تعود بالفائدة أولا عليك وثانيا على أفراد
مجتمعك و مجتمعك. لاتستهين بأي فرصة ولاتتردد في التنفيذ.
0 comments