حالة فقد
5:33 AM
موضوع اليوم حساس جدا وقد يلامس
شيئا في أعماق قلوبكم. سأتجرأ اليوم لأضع يدي على الوتر الحساس الذي يؤرق حياة
الاغلبية. راح اتعدى الحدود واكسر حاجز مراعاة مشاعركم مو نذاله مني ولكن لمصلحتكم
عشان تلحقون على اللي بقى من حياتكم وتستغلونها بشكل يرضي ربي ويرضيكم.
كل شخص في هذي الحياة عانى من
الفقد اما برحيل شخص عزيز عن الحياة والبشر كلهم او برحيله عن حياته هو فقط.
وأغلبنا عانى ومازال يعاني من مرارة هذا الفقد لذالك قررت اتكلم في هالموضوع لاني
وحده من هالناس اللي عانت الفقد بكلا النوعين وماراح اتكلم الا بشي انا جربته
وتعلمت درسي منه واتمنى انتوا بعد تتعلمونه مثلي وتعيشون حياتكم بشكل صحيح.
مشاعرنا السلبيه تأثر علينا
بدون مانحس، نفقد لذة الحياة ونضيع اللحظه بسبب امر مكتوب ومنتهي يعني ردة فعلنا
اتجاهه ماراح تغيره ابدا وحزننا وتوقفنا عن ممارسة حياتنا بشكل طبيعي ماراح يرجع الزمن ورا ابدا. ثق
بأن اللي صار صار واللي مضى انتهى ومالنا اي خيار في تغييره ولكن عندنا فرصه نكمل
حياتنا بشكل حلو يسعدنا ويسعد اللي يحبونا سواء كانوا معنا في هالحياة او تركونا.
ممكن تقول هذي وش تقول،خرفت او ماجربت عشان كذا تقول كلام فارغ. انا معكم لو اسمع
هذا الكلام من شخص بقول هذا ماجرب عشان كذا مايعرف وش يتكلم عنه. كيف ممكن اعيش
حياتي بدون هذا الشخص اللي رحل عن الحياة للابد او اللي راح وأتمنى القاه لو صدفه،
كيف وانا عايش ادق تفاصيل حياتي معه. وكل هالكلام صحيح ومعكم حق فيه لكن ليش ربي
رزقنا نعمة العقل والنسيان؟!
أحمد ربي اللي رزقنا بنعمة
النسيان وأعطانا عقل عشان نفكر في الامور ونكتشف الأشياء ونختار منها اللي
يناسبنا. ثق تماما بأن كل شي يصير في هذي الحياة سيء كان او حلو مايصير الا لهدف
وحكمه راح تكتشفها مع الوقت وبتحمد ربي عليها وان كانت صعبه في وقتها. الله خلقك
وهو قادر على تسيير امورك بالطريقة اللي تريحك وتسعدك وان تعبتك في البدايه. تذكر
دائما الهدف الاساسي من وجودك في هذي الحياة وليش اساسا انت صرت موجود فيها
"وماخلقت الجن والإنس الا ليعبدون". نعم هذا هو الهدف من وجودك في هذي
الحياة اللي لو ركزت عليه هانت الدنيا في عينك وتسهلت امورك.
راح اقول لكم عن بعض الامور
اللي تعلمتها واللي نفذتها ونفعتني بعد الله في تقبل حالة الفقد والاستمرار
بالحياة:
اولا:الفقد بسبب أمر الله.
- كلنا مؤمنين بأن الدنيا فانيه
وبأن امر الله بيصير للجميع الحين او بعدين. كلنا راح نعاني من هالشي لانه مكتوب
ومقدر وماحد راح يظل ع هالدنيا "ويبقى وجه ربك ذو الجلال والإكرام". هو
الوحيد اللي راح يبقى فمن حنا عشان مانفقد احد او نغيب عن هالدنيا. اليوم هذا
الشخص العزيز وبكره انت >بعيد الشر.لما تخلي هالشي في بالك وتؤمن
فيه إيمان صادق بأنه أمر الله المكتوب وانه لابد يصير في يوم من الأيام راح يهون
الامر عليك شوي.
- ثق تماما برحيل هذا الشخص قد
تكون راحه له من هالدنيا وتعبها وبيروح عند ربه في مكان افضل بإذن الله.
- تأكد بأن هذا الشخص يراقبك
لذالك لاتسوي شي يزعله يعني لاتحزن ولاتبكي ولاتضيق عشان ماتضيق عليه في قبره.
- كل ماخطر في بالك هالشخص ادع له
بالرحمه او تصدق بنيته. سو أي شي ممكن يريحه ويكسبه الاجر لان هذا اللي يحتاجه.
الشخص لما يرحل يحتاج حبكم وسعادتكم ومايحتاج حزنكم ابدا.
ثانيا:الفقد بسبب شخصي
- دوام الحال من المحال. والدنيا
تاخذ وتعطي وكل شخص تقابله راح تتركه بسبب الظروف لان الحياة في تغير مستمر
وظروفها احيانا معنا واحيانا ضدنا. الايمان بفكرة ان هذا الشخص مستحيل يتركك راح
دمرك لان هالشي مستحيل حدوثه أخوك وهو أخوك راح ينشغل بحياته وتكوين نفسه ولو ان
البيت مايجمعكم ماكان يمكن سأل عن أخبارك او جلس معك طول حياته>الدم يفرض قوته.
كلامي عن الاشخاص اللي مو عائلتك اما صديق او صديقه، زوجة او زوج او اي شخص يدخل
حياتك ويترك فيها أثر. هالشخص راح ينشغل بحياته ويسعى لتحقيق طموحه اللي ممكن
يلاقيه بعيد عنك. خل في بالك ان الامور في
بدايتها دائما أجمل،ليش؟
لان الشخص في البدايه يحاول
يبهر الطرف الثاني ويثبت انه شخص جدير فيه ويستحق الثقه لذالك ننخدع فيه وننسحر
بتصرفاته لكن لما تزيد أيام العشره بينكم راح تنكشف العيوب وبعض الامور اللي
ماتحبها>يذوب الثلج ويبان المرج.
ممكن بعد فتره من الزمن تكتشف
انكم ماتناسبون لبعض. ممكن تصرفاتك ماتعجبه او ثقتك الزايده انه ماراح يخليك تخليك
تتمادى بتصرفاتك بدون ماتحس مما يسبب نفور الطرف الثاني. يعني لاتثق باستمرارية
وجود هذا الشخص بحياتك عشان ماتصدمك غيبته. لاتثق بأي وعد يتعلق بالبقاء أبدا لان
الشخص في نشوة الفرح يعطي وعود مو قدها أبدا او ممكن يتعاطف مع وضعك ويوعدك لكن لما
يلاقي أول فرصه راح يخليك.
- خل عندك مبدأ وعش على أساسه
"اللي يبيني أبيه واللي بيروح الله معه ماتوقف الدنيا على بشر". لو آمنت
فعلا بهذا المبدأ ثق تماما بأن حالة الفقد ماراح تلازمك وبتتركك بأقرب وقت. مستحيل
مانتألم لما نفترق عن شخص غالي او الظروف تجبرنا على الفراق. أكيد بنتألم وبنعيش
حالة من الالم والبكاء الهستيري والضيقه الملازمه وتحس انك فقدت طعم الحياة لكن
خلك ذكي وتخلص منها قبل تلازمك، كيف؟
- تكلم مع نفسك واقنعها بأن مثل
ما هالشخص رضى بهالفراق وعايش حياته ولااهتم فيني وباللي راح أعانيه، أنا بالمثل
لي الحق بأني أعيش حياتي وبالطريقة اللي أنا أبيها.وبعدين من هذا الشخص اللي يستاهل ادمر حياتي عشانه, لا هو بشي مقدس ولا أب ولا أخ ولا أخت ولا أم , هو مجرد عابر سبيل بحياتك مثل مادخلها ربك بيعوضك بأفضل منه. الدنيا ماتوقف على أحد مصيرها تستمر.
- انت مو تبيع لأحد وماحد له الحق
يتحكم في حياتك. كن انت المسيطر على حياتك والمسئول الوحيد عن مشاعرك. هالشي يبي
له وقت ولكن مع المحاوله والاصرار راح تقدر توصل لهالوضع وبوقت قياسي جدا.
- ثق بأن الله مايأخذ شيئا الا
ورزقك بأجمل منه. يغيب شخص ليترك في قلبك مساحه لشخص ثاني. يغيب شخص عنك بغرض ان
ربي يحميك من شره لان احتمال وجوده بحياتك شر لك وضرر عليك في المستقبل.
- اقنع عقلك الباطن بأن ذاتك أحق
بأن تشغل نفسك فيها مو في غيرها. اشتغل على نفسك وطور منها وتعلم أشياء جديده
وتعرف على ناس جدد لتتخلص من سيطرة ذلك الشخص على حياتك.
- اشغل نفسك بالأمور اللي تحبها
بهالشكل راح تقضي على الفراغ اللي هو اساسا سبب تفكيرك وسبب تعلقك بالشخص. لانك
فاضي بتجلس تفكر لكن لما تكون مشغول ماراح تلاقي الوقت اللي تفكر فيه.
- قبل النوم اتوقع هو الوقت اللي
تكثر فيه الافكار والوسواس لذالك اقرأ اذكارك واقرأ سورة الملك والمعوذات واستغفر
الين تنام.
- تذكر بأن فيه أمور تستحق تستثمر وقتك فيها بدل ماتضيع على التفكير في ابن آدم اللي راح يتخلى عنك يوم القيامة وماراح ينفعك أبدا مثل حفظ القران والصيام والصلاة والتقرب من الله أكثر. وكلنا نعرف فضل التقرب الى الله يمدك بشعور الراحة والطمأنينة والإكتفاء. علق قلبك بخالقك لا بخلقه.
هذي المشاعر السلبية تؤثر على
حالتنا النفسية وبالتالي على درجة إنجازنا وتحقيقنا لأهدافنا وهي السبب في شعورنا
بالضياع والتشتت فلما تسيطر عليها وتتحكم فيها راح تقوى بصيرتك وتركز أكثر على
أهدافك. وماننسى تأثير الحالة النفسية على التصالح مع الذات وتحقيق مانريد.
1 comments
كلامك في الصميم وواقعي ومقنع جداً.. ماشاءالله عليك
ReplyDelete