تخلص من ضغط العمل
7:03 AM
قبل كم يوم قرأت موضوع في اخبار CNN العربية عن ضغوط العمل وحسيت
بأن الموضوع مهم إني أتكلم فيه. فلذالك راح أتكلم عن الموضوع من وجهة نظري.
أولا: أسباب الشعور بالضغط:
- اختيار عمل لا يتناسب مع ميولك واهتماماتك
لما تختار عمل ما تحبه وقبلت فيه بسبب رغبة أو طمع في الراتب او تقضية الوقت
او ضغط من الاهل ما راح تحس بالحماس فيه وراح تحس بالضغط يوميا وبأن اليوم يمر
ثقيل كأنه سنه. بتلاقي نفسك مجبور علية وتحاول طول وقتك تتأقلم عليه.
- العلاقة مع المدير والزملاء
لما تكون العلاقة بينك وبين زملائك في العمل او مديرك متوترة بمعنى
انو التفاهم والمراعاة والحب والاحترام مو موجودة راح تحس بالضغط النفسي أكثر
وبالتالي راح يأثر على صحتك وعقلك ونسبة انجازك.
- كثرة المهام
تصير المهام كثيرة لما تأجل شغل اليوم ليوم ثاني وتكاسلك في انجاز
المهام بشكل يومي راح يخليها تتراكم وانت اللي بتاكلها في الأخير. أحيانا في العمل
نواجه ضغط من حيث عدد المهام بحسب طبيعة العمل مثلا التدريس يجي ضغط العمل لما تجي
الاختبارات النهائية من وضع أسئلة ورصد درجات وتصوير وسجلات والعديد من الاعمال
اللي تتلف الاعصاب وهذا صار مثل العرف تعودوا عليه. اللي ابي اوضحه هنا انو أحيانا يكون فيه مواسم معينة للضغط في المهام وهذي
تكون على الجميع ومن المسلمات.
- عدم تنظيم الوقت
البعض يؤجل العمل لأي وقت ثاني يعني على حسب أهمية المهمة لو كانت
مستعجله خلصها سريع واذا مايحتاجونها الا بعد فترة يتركها الين يجي وقتها. والبعض
يجلس يسولف ويتقهوى ويضيع وقته بهالشي ولما يجي وقت الشغل يشوف المهام كثيره
وبالتالي راح يحس بالتوتر والضغط وينجز المهام أي كلام بدون اتقان اهم شي يسكت
المسئول. مافي توازن بين الترفية والعمل.
- اختلاط الحياة الشخصية بالحياة العملية
كلنا عندنا مشاكل في حياتنا الشخصية وتأثر على نفسيتنا وتفكيرنا مو
انت الشخص الوحيد اللي عنده مشاكل ولكن فيه الشخص اللي يقدر ينسى حياتة الشخصية
بمجرد مايدخل العمل وفيه الشخص اللي يأخذ حياتة الشخصية معي الى الدوام. انت لما
تداوم بهالنفسية ماراح تستفيد شي غير الهم والنكد زيادة.
- عدد ساعات عمل طويلة
هذا من الأسباب اللي ممكن تكرهك في الوظيفة وتخليك تحس بالضغط لانك بتمل
ولكن في نفس الوقت مجبور تداوم الين ينتهي الدوام.
- الأنظمة الصارمة
لما يكون نظام المكان اللي تشتغل فيه صارم وغير قابل للتعديل بمعنى
انو مافي مرونه عشان يتناسب مع الظروف الطارئة والخارجة عن الإرادة راح تحس انك
مقيد ومخنوق وبالتالي بالضغط النفسي.
اكيد كل هالاسباب راح تأثر سلبيا علينا وراح يكون لها مضار كثيره
منها:<ثانيا
- الاكتئاب
- التفكير السلبي والتشتت
- ردة الفعل العدوانية
- الصحة من حيث ارتفاع ضغط الدم والسكر وغيرها من الامراض
- الجسد من حيث زيادة الوزن
الان نجي للحل واللي هو المحور الاساسي في موضوعنا مبدأي دائما عشان نحل المشكلة لازم نعرف أسبابها وعرفنا أسباب الشعور
بالضغط في العمل الحين راح نقترح بعض الأمور اللي ممكن تساعدنا في التقليل منه:,<ثالثا
- اختار عمل يناسب ميولك واهتماماتك وقدراتك.
- حبب نفسك في العمل واخلق لك جو مريح.
- اكسر ساعات العمل الطويلة بأنشطة تناسب المكان اللي انت فيه وتناسب
ميولك مثلا سولف مع زملائك او اشرب قهوه او امش شوي او كلم احد من اهلك او اصحابك
وتواصل معهم في برامج التواصل او أي نشاط ممكن يغير جوك.
- حاول تفصل حياتك الشخصية عن العملية بمعنى انك تحافظ على كل حياة
بمكانها المخصص واتخذ من العمل مكان للترفية عن نفسك عشان تنسى اللي صاير معك او
العكس ممكن نعتبر البيت مكان راحة ينسينا ضغط العمل.
- رتب مهامك بإستمرار ولاتأجل عمل اليوم الى الغد لانك بتندم. كل ماخلصت
مهامك كل ماانت ارتحت اكثر.
- نظم وقتك بحيث تكون عارف اليوم كيف راح تقضي يومك وبكذا توفر الوقت
والجهد وتكتسب راحة البال وتنجز بشكل سريع وسهل وبجودة عالية.
- احرص دائما على بناء علاقة كويسة مع زملائك في العمل ومديرك لانك انت
الشخص المستفيد راح ترتاح نفسيا وتتنفذ طلباتك بدون ماتحرج نفسك. اعتبرهم مثل
اخوانك وعاملهم مثل ماتحب يعاملونك.
- احترم الأنظمة والقوانين وحاول ماتخالفها كثير قدر المستطاع.
- تخلص من المشاعر السلبية اللي تحسها بسبب ضغط العمل اما بكتابتها في
ورقة ثم تحرقها او تفضفض لشخص عزيز عليك بشرط ان الفضفضة ماتكون شكوى ممله ومستمرة
او مارس الرياضة وهذا افضل حل للتخلص من الأفكار السلبية لو تمشي لمدة 20 دقيقة.
- اعتبر كل شي تسوية خالص لوجه الله ونيتك فيه ابتغاء الاجر.
- فكر دائما بإيجابية وانا دائما اركز على هالموضوع لان له مفعول سحري
غير طبيعي. اخلق من الامر السلبي لحظة حلوة وحول ضغط العمل الى متعة لان لما تغير
تفكيرك اتجاة العمل راح تكسب كثير من حيث راحة البال والسعادة والتفاني.
- ثق تماما بأن شعورك بالضغط او الاكتئاب من العمل ماراح يغير من الحال شيء بتتضرر على الفاضي لذالك لاتضيع وقتك فيه ابدا لان اليوم اللي يمضي مايرجع ابدا
وبتندم لانك ضيعته بهالتفكير السلبي.
- قلل من الشكاوي المستمرة والملل لانك راح تعيشها واقع وراح تأثر على
غيرك. احتفظ بسلبيتك لنفسك ولاتنقل العدوى للاخرين ابدا فكل شخص عنده اللي يكفيه.
ولاتنسون ان العمل هو نعمة من الله وكشكر وتقدير لله على هذي النعمة
لازم نؤديها بأمانه وإخلاص وتفاني عشان يبارك لنا في رواتبنا ويرزقنا بالأفضل.
التفكير السلبي والشعور بالضغط والاكتئاب بسبب العمل وكثرة الشكاوي تعتبر من وجهة نظري
جحود لنعمة الله لذالك لاتكون جاحد ابدا وثق تماما بأن الخيرة فيما كتبة الله لك وبأن الله يعطي الشخص على حسب نيته وتفكيره.
0 comments