تنظيم الوقت
7:20 AM
كلنا نحلم تكون عندنا حياة هادية وسعيدة نمتلك فيها كل شيء نتمناه
ونحاول قد ما نقدر ولكن للأسف أحيانا نفشل بهالشي او بالمعنى الأصح نفقد السيطرة
على أمور حياتنا ونحس ما عندنا الوقت الكافي لإنجاز كل الأمور والسبب الرئيسي لهذا الشعورهو فشلنا في تنظيم الوقت وإدارته.
كلنا نملك 24 ساعة في اليوم ولكن نشوف ناس ما شاء الله عليهم مستمتعين
بحياتهم مثل ما يحبون يشتغلون وينجزون مهام كثيره ويرفهون عن أنفسهم ومع ذلك يبقى
عندهم وقت فراغ وناس تقضي يومها وهي جالسة ما انجزت شيء وما رفهت عن نفسها ورغم
ذلك تشتكي ان ما عندها وقت، الفرق بين هذي المجموعتين هو ان المجموعة الأولى عندها
إحساس بأهمية الوقت ونجحت في تسخير الوقت لخدمتها بعكس المجموعة الثانية اللي
تتميز باللامبالاة ومخليه حياتها ع البركة اللي يصير يصير.
من هالكلام كله أتوقع خطر على بالكم السؤال التالي:
كيف ممكن أنظم وقتي
وأستخدمه لصالحي؟
أولا: لازم تحس بأهمية الوقت وبأن الوقت سلاح ذو حدين
بمعنى لو ما استغليته لخدمتك راح يدمرك والعكس وبمعنى آخر لازم تؤمن بأن الوقت
كالسيف ان لم تقطعه قطعك.
ثانيا: لازم تعرف
وش مهامك اللي انت مسئول عنها وضروري تسويها عشان تعيش بشكل جيد ومثل ما تتمنى. لتحديد المهام يفضل اتباع النماذج التالية لان راح تساعدك كثير
من خلال هالجداول
اتضح لك ان المهام أنواع مهم وغير مهم، عاجل وغير عاجل انت راح ترتب مهامك على
هالاساس عشان ماتضيع وقتك في شيء مو مهم وتندم على وقتك اللي ضيعته.
بعد ماحددت نوع
مهامك نجي الحين الى ترتيب الوقت بحسب المهام. خل في بالك ان ترتيبك لوقتك يكون
على حسب مهامك، كيف!
المهام لها ثلاثة
تصنيفات:
- مهام يوميه بمعنى
اشياء لازم تسويها يوميا مثلا الطبخ والتنظيف والصلاة وغيرها
- مهام اسبوعيه
بمعنى تقدر تنجزها خلال اسبوع مثل قراءة كتاب او الاستحمام وغيرها
- مهام شهريه وهذي تستغرق
شهر لانجازها مثل عمل بحث او ريجيم وغيرها من المهام اللي تستغرق وقت.
حاول تسوي لك جدول مقسم الى 3
خانات (يومية/أسبوعية/شهرية) وتكتب تحت كل خانة مهامك بحيث تكون كلها قدامك
وماتنسى شي وعلق هالورقة في مكان بارز بحيث تشوفه كل يوم.
ملاحظة: لاحظ ان اليومية راح تكون كل يوم اما الأسبوعية راح تكون في
أيام محددة انت حددها (كل مهمة تكتبها تحت هالخانة اكتب معها يومها المحدد
والتاريخ والشهرية نفس الشي)
وعشان ترتب هالمهام كلها يفضل استخدام المذكرة الخاصة بالتخطيط تكون
موزعة على أيام السنة (وأيضا مذكرة الجوال) وممكن بعد نستخدم ورق الملاحظات اللاصق أو السبورة أو لوحة المهام
الخشبية (موضحة بالصورة الرئيسة للموضوع فوق)
لاتنسى تخلي خطتك وترتيبك للمهام مرنه بمعنى انها قابلة للتغير لان
الشخص مايضمن ظروفه ومايضمن وش يصير معه لان أحيانا تكون فيه أمور خارجة عن
ارادتنا فنضطر نلغي بعض المهام. سؤالي وش المهام اللي راح نلغيها؟!
صحيح مثل ماخطر ع بالك جميع المهام الا المهام العاجلة المهمة اللي
مانقدر نأجلها.
ثالثا: بعد ماحددت المهام وصنفتها الحين يجي وقت تحديد الفترة
المناسبة لانجاز المهام بمعنى انو ماينفع نحدد المهام ومانقدر الوقت اللي ممكن
ننجز فيه هذي المهمه وبمعنى آخر يفضل كل مهمة تكتبها تقدر لها الوقت اللي ممكن
تحتاجه في إنجازها مثلا الاستحمام يحتاج لساعة تقريبا, حل الواجب يحتاج نص ساعة او
مثلا تنظيف كامل للغرفة يحتاج ساعتين. ليش لازم نحدد الوقت!
لما تحدد الوقت راح تكون عارف مدة انشغالك والمدة اللي راح تكون فيها
فاضي بالتالي ممكن تستغل هالوقت الفاضي في الترفية عن نفسك بطلعة مع الأصدقاء او
الاهل وغيرها من وسائل الترفية.
أهمية تنظيم الوقت:
- السيطرة على حياتك.
- يصير لحياتك معنى لان صار عندك هدف وغاية تسعى لتحقيقها.
- التخلص من الضياع والتشتت.
- تستغل وقتك بشيء مفيد.
- الشعور بالراحة والطمأنينة.
- تعزز ثقتك بنفسك.
- تحافظ على ايجابيتك وهدوئك.
- تتخلص من الضغط ويصير عندك وقت للرفاهية.
مسببات ضياع الوقت:
- ماتحس بأهمية الوقت.
- ماعندك هدف في الحياة.
- تفكيرك الخاطئ بأن التخطيط وتنظيم الوقت غير مهم.
- تقضي الكثير من الوقت على مواقع التواصل الاجتماعي.
- تنشغل بأمور الاخرين وتنسى نفسك.
- ماتحب ذاتك ولاتقدرها.
- لخبطة النوم.
- الضغط وكثرة المهام مما يسبب فقدان التركيز.
- حب التقليد للآخرين.
بعض النصائح العامة:
- حاول تخلي التخطيط ليومك عادة اما قبل النوم او لما تصحى عشان تكون
عارف كيف بيكون يومك ومايضيع بدون ماتستفيد منه.
- اكتب دائما الملاحظات المهمة المتعلقة بالمهام الموكلة اليك مثلا مهمة
خاصة بدوامك او المهام الضرورية بالنسبة لك مثل موعد اختبار او موعد مع
الدكتور بكذا ماتنساها.
- رتب المكان اللي حولك لانه يأثر على نفسيتك وانجازك. اختلط كثير
بالناس الإيجابية وتصفح النت او تابع فيديوهات اليوتيوب عن تنظيم الوقت وتحفيز
الذات لان هالشي راح يخليك محافظ على حماسك وماتمل.
- شارك عادة التخطيط مع أقرب الناس لك راح تصير أكثر متعه.
- قيم نفسك في نهاية كل يوم وشوف نسبة انجازك واكتشف الخلل لو كان فيه
وحاول تعدله في اليوم الثاني.
- لاتأجل عمل اليوم لوقت ثاني اذا ماكان فيه سبب قوي يمنعك من الانجاز.
- لاتكثر المهام في اليوم الواحد عشان ماتحس بالضغط والملل.
- خصص وقت للرفاهية يوميا لو ساعة وحده تكفي.
0 comments