تقديم برزينتيشن ناجح
7:45 AM
يعاني البعض من مشكلة الارتباك والخوف وعدم الثقة بالنفس لما يُطلب
منه يقدم عرض (برزينتيشن) عن أي موضوع سواء له علاقة بتخصصه او لا، ليش؟ لسببين:
الأول: ما عنده ثقة بقدراته وامكانياته.
الثاني: ما استعد بشكل جيد للعرض.
طبعا السبب الأول نتيجة للسبب الثاني. لما ماتكون مستعد بشكل ممتاز
ماراح تكون واثق من نفسك مثل لما يكون عندك اختبار وماتذاكر زين راح تكون خايف
وقلقان من النتيجة لكن لما تدرس بكل جهدك راح تكون واثق انك بتعدي الاختبار بشكل
حلو.
لازم تتعلم كيف تجهز نفسك لأي مهمة في حياتك سواء اختبار او عرض او
مشروع او أي مهمة بتسويها لان لما تكون فاهم المهمة ومستعد لها تماما راح تلاقيها
سهلة وممتعة وتنجزها بنجاح بإذن الله لانك عارفها زين ومحدد الطريقة اللي
بتستخدمها من قبل ماتبدأ فيها.
البعض يعاني من الخوف والتوتر لما يوقف يتكلم قدام مجموعة او مثلا
يكون في جمعه فيها ناس كثير, يعني يكون هالشيء فيه عادة كيف ممكن يتخلص منها:
لازم أولا تقنع نفسك ان الناس اللي حولك (سواء كنت في مكان عمل او
جمعه عائلية) مجرد بشر حالهم حالك ومافي فرق بينك وبينهم بمعنى انهم ما راح
ياكلونك او يذبحونك او يعذبونك لذالك مافي داعي تتوتر منهم.
ثانيا عزز ثقتك بنفسك ولاتترك لهم مجال
يستضعفونك او يعززون توترك منهم، كن واثق من نفسك دائما مهما ارتكبت من أخطاء تزيد
من توترك خلك واثق شوي شوي راح تتخلص من عادة التوتر. خاطب عقلك دائما بعبارات
التشجيع بأنك شخص جيد وأفضل منهم وحالك حالهم لذالك ماحد يستاهل أخاف منه او اتوتر
بسببه لاهم آلهة ولا مقدسين لكل شخص خطأه ونقطة ضعفه.
كيف ممكن تستعد للعرض؟
راح اقترح بعض الخطوات البسيطة واللي ان شاء الله راح تكون مفيدة لكم
وتستفيدون منها. دائما لما يطلب منك الدكتور او المعلم عمل عرض وتقدمة قدام زملائك
في الصف اتبع الخطوات التالية عشان تأدية بشكل جيد:
- حدد المجال اللي حاب تتكلم فيه (هذي لما يكون لكم حرية اختيار
الموضوع):
بمعني تحدد انت وش حاب تتكلم عنه, وش المجال اللي تحس عندك معلومات
عنه وراح تبدع فيه أو مثلا تحس انو محتاج أحد يتكلم عنه مثلا مجال التكنولوجيا او
التعليم او الطب وغيرها من المجالات المتاحة.
-اختيار الموضوع المناسب
انت بعد ماتحدد المجال لازم تحدد موضوع معين تتكلم فيه مثلا انت اخترت
مجال التكنولوجيا راح تتكلم عن تأثير هذي التكنولوجيا على حياتنا وراح تذكر امثلة
عليها. هنا تصير انت عارف وش الموضوع اللي راح تبحث عنه وتجمع معلومات عنه.
- توضيح الفكرة
لازم تحدد فكرتك بشكل واضح وبسيط ومفهوم للجميع. اختار الطريقة
المناسبة لعرض هذا الموضوع وحدد الجوانب اللي حاب تتكلم عنها في هذا الموضوع ويفضل
هنا استخدام خرائط المفاهيم(مثل اللي في الصورة تحت) للتوضيح مثلا انت اخترت تأثير
التكنولوجيا على حياتنا وش الجوانب اللي لازم تركز عليها أولا مقدمة بسيطة عن
تاريخها بعدها مميزاتها وعيوبها بعدين ذكر امثله عليها وتتكلم عن مثال واحد وتذكر
معلومات عنه وفائدته. هنا راح تحدد طريقة كتابتك للموضوع وطريقة عرضك له. في هذي
الخطوة لازم تكون حريص جدا
- جمع المعلومات
هذي خطوة مهمة جدا. انت بعد ماتحدد موضوعك والجوانب اللي حاب تتكلم
عنها يجي وقت تجميع المعلومات. احرص تكون معلوماتك دائما من مصدر موثوق كالكتب والأبحاث
والدراسات. حاول تجمع المعلومات المهمة واللي لها علاقة مباشرة بالموضوع واترك
المعلومات اللي مالها داعي وتكون بس زيادة عدد عشان ما تشتت نفسك وزملائك. معلومات
واضحة وبسيطة وتدعم موضوعك بقوة. حاول تخلي جزء من موضوعك يحتوي على دراسات
واحصائيات بسيطة لان هذي الأشياء تكسبك القوة وتخلي عرضك ممتع. اتبع دائما مقولة
"خير الكلام ماقل ودل" عمر المعلومات الكثيرة ماتعني انك شخص فاهم او
شخص مبدع بالعكس راح تثبت انك شخص مو عارف وش تتكلم عنه وكثر المعلومات يسبب الملل
والنفور.
- ترتيب المعلومات وطريقة عرضها
احرص على ترتيب المعلومات بشكل سلسل عشان يسهل عليك تذكرها ويسهل على
زملائك فهمها. احرص على وضع صور في عرضك لانها تلفت المتلقي وتشد انتباهه وتغير من
روتين السرد الممل لكن انتبه مو تحط صور كثيرة وبشكل مبالغ, حاول تستخدمها وقت
الحاجة وللتوضيح. اعتمد التصميم البسيط في عرضك.
بعد ماترتب موضوعك وتكتبة يجي الحين الشيء المهم اللي هو طريقة عرضك
لها. لاتكون شخص ممل ويتكلم بس كأنك تحكي قصة، لا حاول دائما تكون طريقة عرضك
محفزة ومشجعه عشان تبعد الملل عن المتلقين وتدخلهم جو معك. حاول تلقي دعابة أثناء
عرضك كتغيير للجو أو مثلا تخليهم يشاركون في نشاط معك (طبعا النشاط حاول يكون له
علاقة بموضوعك مثلا كإثبات نظرية في العرض او التوصل لاستنتاج). استخدم لغة الجسد لأنها
معبرة أكثر واستخدم تعابير وجهك لإيصال المعلومة (استخدمها بطريقة متزنة ومو تصير
كأنك مهرج تناقز من مكان لمكان هههههه). وفي نهاية العرض خلهم يشاركونك آرائهم اما
بطريقة شفهية او عن طريق استبيان.
- الاستعداد للأداء
هذي الخطوة مهمه جدا جدا جدا, انت جهزت نفسك من حيث تجهيز العرض
والمعلومات واخترت الطريقة اللي بتستخدمها وامورك تمام لكن عشان ينتهي هالجهد اللي
سويتة بالنجاح لازم تتدرب على العرض قبل العرض بفترة (طبعا جميع الخطوات السابقة
يبي لها فتره تقريبا من 3 أسابيع الى شهر لان جمع المعلومات يأخذ وقت) مثلا نقول
قبل الموعد بإسبوع حدد لك ساعة يوميا تتدرب فيها على العرض. مثل لنفسك بنفس
الطريقة اللي انت حاب تسويها قدام زملائك. تدرب قدام المراية او أهلك أو صاحبك
لاتتدرب لحالك. مبدئيا راح تتدرب لحالك بعدها راح تحاول قدام المراية بعدها قدام
اهلك واصحابك بكذا راح تكتشف وش الأخطاء اللي عندك وتعدلها وراح تكتشف أشياء جديده
ممكن تساعدك في العرض. حاول تكتب ملاحظات بسيطة تساعدك أثناء العرض على بطاقات او
ورقة بحيث تكون معك يوم العرض.
- وقت التقديم
انت بهاليوم لازم تكون مرتاح نفسيا. نام الليلة اللي قبلها بدري وافطر
فطور كويس وصحصح قبل العرض بساعتين او ثلاث ساعات عشان يمديك تفطر وتلبس وتهيأ
نفسياتك. اختار لبس مريح ومناسب عشان تكون مرتاح وقت العرض وماتشيل هم شكلك او
لبسك.
جهز محتوى العرض والبطاقات اللي كتبت فيها الملاحظات وتوكل على الله.
ثق تمام ان ربي ماراح يضيع لك تعب ان شاء الله.
جهز عرضك قبل العرض بنص ساعة عشان تشوف لو كان فيه شي يبي له تعديل
وتتأكد ان كل أمورك تمام. جهز الأشياء اللي بتحتاجها كأوراق النشاط او الاستبيان
في مكان قريب منك عشان يصير سهل عليك تتحرك وتسيطر على الوضع.
لو ماكان جهاز العرض يحرك الشرائح تلقائيا (يعني يكون بيدك الجهاز
تحريك الشرائح) حاول تنسق مع أحد زملائك قبل العرض بثلاث أيام بحيث تعلمة كيف يحرك
الشرائح ووقت عرض كل شريحة بحيث يوم العرض انت تكون متفرغ بس للكلام والشرح.
هنا راح تعرف مدى ثقتك بنفسك. ابرز ثقتك بنفسك لان هالشي راح ينعكس
على أدائك. حاول بداية عرضك تكون مشوقة وملفته للانتباه. ابدأ بترحيب المتواجدين،
قدم نفسك لهم بكل ثقة، وضح لهم طريقة عرضك وطريقة عرض الأسئلة، ثم اعرض موضوعك
بسلاسة وماترتبك ابدا ولو صار وارتبكت بسبب خطأ صار مشي الموضوع عادي ولا كأنه صار
شي لاتضيع جهدك بسبب خطأ بسيط لان بهالشي راح تثبت لنفسك بأنك قد المهمه وتثبت
للمعلم وزملائك بأنك شخص واثق من نفسك. حاول ماتكون عيونك على الملاحظات او الشاشة
باستمرار لان هالشي يجيب الملل ويعكس لزملائك بأنك مو عارف المحتوى وإنك مو متمكن
من الموضوع اللي انت تتكلم فيه (ناظر فيها لكن من فتره لفتره).
وفي النهاية لاتنسى تتوكل على ربك وتستعين بالناس اللي عندها خبره في
تقديم النصائح وحاول تكون وقفتك ولغة جسدك كويسة وتعكس قوة شخصيتك وثقتك باللي
تقدمة وحافظ على الابتسامة من وقت لوقت واحرص يكونون المتلقين متحمسين معك دائما.
0 comments