أفضل وسيلة تقضي فيها وقت فراغك هو إنك
تسوي شيء تحبه بمعنى اخر تمارس هواياتك مهما كان نوعها. في هالبوست راح اتكلم عن
نوعين من الناس الاول الناس اللي ما عندهم هواية
والثاني الناس اللي عندهم هواية ولكن قبل ما ابدأ راح أعرف
معنى الهواية.
الهواية هي اي نشاط تحبه وتميل له
وتستمتع وانت تسويه بمعنى آخر هو اي نشاط تحس إنك تشوف نفسك فيه وتفرغ طاقتك السلبية
من خلاله وهذي الهواية غالبا تمارسها وقت فراغك.
ممكن الحين البعض يقول طيب أنا
ماعندي هواية ولا اعرف وش هوايتي
وهذا النوع اللي قلته بالبدايه. بالنسبه لهالنوع من الناس يعتقدون ماعندهم هواية
ابدا لأنهم اساسا ماكلفوا أنفسهم يفكرون بذاتهم ويشتغلون عليها او بالأحرى ماجلسوا
جلسة صراحة مع أنفسهم عشان يعرفون وش تحب وش تكره. ثق تماما ان لكل شخص هواية وشي
يحب يسويه ولكن انشغاله عن ذاته وباللي حوله سبب اهماله لهوايته لذالك عشان تعرف
وش هوايتك:
- اجلس في مكان هادي بعيد عن
الازعاج وعن اهلك.
- حاول تفرغ نفسك وتبتعد عن كل
الاشياء اللي تسبب تشتتك مثل الأجهزة والاكل وغيرها من المُلهيات.
- اعطي نفسك فرصه عشان تعرف وش تحب وش
هواياتها وأطلق العنان لتفكيرك.
- اكتب كل شيء يخطر ع بالك تحب تسويه
او تحس براحه لما تسويه. اي شيء مثلا الرسم او تصميم الفوتوشوب او الكتابة او
تجميع العملات وغيرها من الأنشطة اللي تستمتع فيه.
- جرب الامور اللي كتبتها وطلعت معك
بعد التفكير تجربه صادقه عشان تكتشف إذا انت فعلا تحب هالشي وتستمتع فيه او لا.
والامر اللي مايناسبك اتركه وجرب غيره الين تكتشف وش الشغلة اللي فعلا تونسك وقت
فراغك وبكذا تكون هذي هوايتك.
نجي الحين للنوع الثاني الناس اللي
عارفه هوايتها وعارفه وش تحب. هذا النوع خل في بالك انو مايكفي يكون عندك هواية انت
عشان ماتخسر هالهواية لازم تهتم فيها لأنها مثل النبتة إذا ماسقيتها راح تموت
وتختفي. ممكن تسأل كيف ممكن أهتم فيها:
- اهم شيء الممارسة. لازم تمارسها
بشكل شبه يومي.
- طور من هوايتك بالاطلاع ولاتكتفي بالشيء
اللي تعرفه بمعنى إنك لازم تحاول تعرف اكثر عن هوايتك وتتعمق فيها وتكون مُلم بكل
جوانبها.
- ابتكر طرق جديده لممارسة هوايتك
مختلفه عن الطرق التقليديه. ابتكر طريقة خاصه فيك ونمط خاص لك.
- تابع ناس عندهم نفس هوايتك سواء في
اليوتيوب او الانستا او اي موقع تواصل اجتماعي لان بالمشاركه تزيد عندك روح
الحماس.
- حاول تاخذ دورات عن هوايتك بحيث
انها تضيف لك وتستفيد منها أكثر.
ممكن تقول بهالشكل ماراح تصير هوايه
وراح أحس بالالتزام! بالعكس انت لما يكون عندك شغف بشي راح تسوي كل الاشياء اللي
انا ذكرتها بدون ماتحس لانك تحب هالشي وبتحاول تتعمق فيه وانت مستمتع. طبعا الامور
اللي ذكرتها لاتلزم نفسك فيها بحيث تصير مثل الواجب اللي يثقل عليك. استمتع بكل
خطوه تسويها ونفذها بطريقة خفيفه ع نفسك.
خل في بالك احتمال ان هالهوايه ممكن
تتحول لوظيفة والكثير من الناس اتخذوا من هواياتهم وظيفه لهم لانهم يحبونها
وماعندهم مشكله يمارسونها طول الوقت، لذالك كل مااهتميت فيها كل ماكسبت اكثر من
الناحية النفسية والاجتماعية والمادية. اكتشف هوياتك من اليوم واستمتع فيها وطورها
ليش؟! لانك راح:
- تستغل وقتك بشكل فعال وبشي مفيد
تحبه بدل ماتضيعه بدون فايده وبعدين تندم.
- تتخلص من الفراغ المدمر واتوقع
الاغلب عارف الفراغ وش ممكن يسوي>ان شاء الله بسوي موضوع عن هالشي.
- تفرغ طاقاتك السلبية بطريقة سليمه.
- تسخر مواهبك لخدمتك ولراحتك.
- تكسب الراحة النفسية والثقة.
- تحس بقيمة ذاتك وتجبر اللي حولك على
احترامها وتقديرها.
