طبيعة البعض حب الروتين وصعوبة تقبل التغيير. البعض يرتاح لما يسوي نفس الانشطه يوميا ومايحاول يغير من طبعه ولو شوي ويتخوف من فكرة اضافة شي جديد لحياته إما بسبب الخوف من الفشل او مايبي يحمل نفسه مسئولية جديده، وهالشي خطأ كبير ترتكبه في حق ذاتك لان الحياة تستحق تعيشها مادام الشي الجديد اللي بتضيفه لحياتك مايخالف شرع ولايزعل اهلك ومايضرك. حاول يكون عندك شوية جرأه في تجربة الاشياء الجديده واكتساب عادات جديده مفيده تضيف لك وتزيد سعادتك. حاول كل شهر تضيف لك عادة مفيده لان هالشي راح يغير نفسياتك ويجدد حياتك ويزيدك حيويه ونشاط ويخليك تحب الحياة اكثر ومتفائل ومُحفز دائما. لذلك قررت اكتب بعض الامور اللي تساعدك في اكتساب عاده جديده ممكن تعتبرها قوانين لاكتساب عادة مفيده جديده.
اذا حبيت تكّون عادة جديده حاول تتبع مايلي:
- حاول تجرب هالعاده حتى لو غلطت فيها مو مشكله كمل لان الخطأ يعلم الشطّار😉 لاتخلي الخطأ عذر لك بالعكس راح يساعدك تكتشف طريقة ثانيه تنجز فيها هالعاده بشكل افضل مثلا لو حبيت تكسب الرياضه كعاده وبديت اول يوم تتمرن ٣ ساعات متواصله😱😱 واليوم الثاني حسيت بعجز والم في جسمك وماقدرت تتمرن هنا راح تتعلم ان طريقتك غلط وراح تفكر بشكل مختلف بحيث تهيأ جسمك لاداء التمارين تدريجيا🤗
- قليل مستمر خير من كثر منقطع بمعنى لما تقرر تكسب عاده حاول توزعها ع الايام بشكل متساوي ووقت مناسب بحيث تكون بشكل يومي مثلا عادة القراءه انك تقرأ صفحتين يوميا لمدة مثلا ربع ساعه افضل بكثيييير من قراءه ١٥ صفحه خلال ساعه يومين في الاسبوع
- لو كانت العاده صعبه وتحتاج جهد وفهم اكثر حاول تقسمها لك نرجع لمثال الرياضه هذي لازم تهيأ جسمك لها فراح تبدأ اليوم رياضه لمدة نص ساعه مشي وبكره نص ساعه مشي وتمارين للخصر واليوم اللي بعده مشي ورياضة خصر ورياضه للجزء السفلي من الجسم وكذا لحد ماتنجز كل انواع الرياضه اللي حاب تسويها في يومك او مثلا لو حبيت تتعلم لغه ابدأ اولا بتعلم الحروف كيف تنطقها وبعدين كيف تكتبها وبعدين تبدأ في الكلمات الاساسيه وكذا يسهل عليك تعلم اللغه بشكل سلسل وسهل. لاتحمل نفسك فوق طاقتها ابدا "لايكلف الله نفسا الا وسعها"
- نبدأ نغير انفسنا بتقبل هذي العادة ونهيأ البيئه اللي حولنا لتحقيقها مثلا لو بتسوي دايت لازم تهيأ البيئه من خلال انك تتخلص من كل الاكل اللي فيه دهون كثيره وتوفر لك الاكل الصحي وتوفر مكان للرياضه
في النهاية عشان تكسب عاده جديده حاول تدرسها من كل النواحي وتأثيرها عليك وفوائدها وهل تنفع لك او لا وهل وقتك يسمح لك تسويها او لا.
ملاحظة: كل مايكتب هنا ثمرة قرائتي و حصيلة تجاربي فلا تنسب لنفسك جهدي وتعبي لك حرية التعبير عن اعجابك بما كتب هنا بمشاركته الاخرين و لكن بشرط ذكر المصدر (kselfhelp.blogspot.com) و لك جزيل الشكر والامتنان كن كما تود ان تكون ولا تصبح مقلدا يسرق جهد الاخرين !ابذل القليل من الجهد
