استثمار وقت الفراغ
4:30 PM
أحد الأسباب اللي تسبب الضياع والتشتت وتخلينا نتمسك بأشياء مالها
داعي حتى لو كانت مدمرة هو الفراغ. لما تكون شخص فاضي ما عندك هدف ولا حلم تسعى
لتحقيقه راح تكون على حافة الانهيار وتبدأ في تدمير نفسك بدون ماتحس. حاول تجلس مع
نفسك جلسة صراحة من فترة لفترة وقيم حياتك وشوف أنت كيف تقضي حياتك وهل انت فعلا
تعيشها بالشكل الصحيح او تعيش على الفاضي مالك طموح ولا هدف, ومثل ماقلت قبل إذا
ماكان عندك هدف ماراح يكون فيه معنى لحياتك.
رتب أولوياتك واختار الأهداف المناسبة لك ولقدراتك. حاول تخلي عندك
عادة كتابة كل شي تحلم فيه مثلا خصص لك دفتر خاص بأحلامك وكل مرة يخطر على بالك
فكرة تتمناها سجلها في هالدفتر بحيث يكون مرجع لك من فترة لفترة. بعد ماتكتب
أحلامك اختار أحبها وأقربها الى نفسك وفعلا تتمناه يصير واقع وبعد ذلك ابدأ خطط
كيف ممكن تنفذ هالحلم وبكذا تصير تقضي وقتك في شي مفيد ولصالحك<تكلمنا عن التخطيط في مواضيع سابقه.
مع تطور الزمن والتكنولوجيا صرنا نواجه مضيعات كثيرة للوقت, تسرق منا
وقتنا بدون ما ننتبه ولاتنسى عزيزي القارئ بأن ربي راح يسألك عن كل دقيقه مرت في
حياتك وش قضيتها فيه "وعن عمره فيما أفناه" لذالك حاول دائما تقضية بشكل
يرضي ربك وطموحك وذاتك. بعض هالأسباب المضيعة للوقت:
- مواقع التواصل الاجتماعي.
- أصحاب السوء.
- عدم الإحساس بالمسئولية.
- عدم الإيمان بأهمية الوقت.
- حب الاتكال.
- التسويف.
- البيئة السيئة.
- عدم محاسبة النفس.
- عدم وجود هدف واضح.
- كثرة النوم.
كل هالأسباب تقدر تغيرها وتخليها تصير لصالحك مثلا مواقع التواصل ممكن
بدل ماتستخدمها للدردشة والسوالف مع الناس حاول تستفيد منها في انك تتعلم شي جديد
او تقرأ عن الأشياء اللي انت مهتم فيها. والنوم قلل ساعات نومك بحيث ماتتجاوز 8
ساعات يوميا واستشعر قيمة الوقت وحاسب نفسك على ضياعه وعدم استغلالة بشكل صحيح ,
نم حس المسئولية عندك وحدد لك بعض الأهداف اللي تشغل نفسك في تحقيقها, غير أصحابك
واختلط بناس إيجابية وفعاله أكثر. هذي بعض الحلول السريعة للأسباب المذكورة. الحين راح اذكر
لكم بعض الاقتراحات اللي ممكن تستفيدون منها في وقت الفراغ:
- اشترك بحلقات حفظ القران أو انت رتب لك جدول للحفظ خاص فيك.
- شارك بالأعمال التطوعية سواء عبر مواقع التواصل أو في مدينتك.
- تعلم الرسم.
- اقرأ كتاب أو مقالات لها علاقة بالجوانب اللي تهتم فيها.
- مارس الرياضة (المشي او الكره او السباحة او أي رياضه تناسبك وتحبها)
- رتب غرفتك (للبنات تنظيف البيت وتغيير ترتيب بعض الأشياء فيه يغير
النفسية)
- ساعد أمك أو أختك في الطبخ كنوع من التغيير والتعبير عن حبك لهم<<الشباب راح
يعترضون هههههههه
- احضر دورات تدريبية سواء أونلاين او في مراكز التدريب وأنصحكم بمنصة
إدراك ورواق للدورات التدريبية المجانية وبشهاده.
وفيه أمور كثيرة تقدر تسويها وقت فراغك بس ماحبيت أطول الموضوع عشان
ما تملون لذالك اللي عنده اقتراح زيادة يكتب في التعليقات تحت. طبعا لاننسى الجلسة
مع الاهل والاتصال بالأصدقاء مهمة ولكن احرص على اختيار أصدقاء كويسين ولاتخلي
تواصلك معهم يشغلك عن نفسك وأهلك, يعنى احرص على التوازن في جميع أمور حياتك.
0 comments