لكي تنجز أمرا ما في حياتك لابد أن تتوفر لديك بعض الامور. هذي الامور اذا تواجدت عندك تأكد بإذن الله بأنك راح تكون شخص ناجح ومُنجز. تكلمت عن هذي الامور في الانستا بشكل مبسط لكن هنا راح اتكلم عنها ان شاء الله بشكل مفصل.
هذي الامور نسميها مبادئ الإنجاز (مبادئ النجاح) او مفاتيح النجاح (معادلة النجاح)
اول هذي المبادىء التوكل ع الله:
لابد تكون نيتك خالصه لله في كل عمل تسويه صغير اوكبير وتكون واثق فيه ثقه عمياء بأن الله سبحانه راح يحقق النتيجه اللي تتمناها ويكافئك ع قد تعبك وماراح يكتب لك الا كل خير
ثانيا: برمجة العقل الباطن:
دائما اتكلم عن هالشي لان اللاوعي(العقل الباطن) هو الاساس اللي تعتمد عليه كل تصرفاتك فلذالك لابد تبرمجه برمجه صحيحه تخدمك لان اذا كان ايجابي ومُحفز صرت انت شخص كويس. كيف تبرمجه؟!
بالعبارات الايجابيه والامور اللي انت تتمناها بمعنى خاطب اللاوعي بكل الامور اللي فعلا تبيها وهو تلقائي راح يتبرمج ويسخر كل شي تسويه لانجاز هذي البرمجه مثلا لما تقول انا شخص هادي وتكرر هالشي مع الايام راح تلاحظ فعلا انك صرت هادي بدون ماتبذل الكثير من الجهد لان اللاوعي لما يتبرمج ع شغله راح يخليك تسويها تلقائيا الين فجأه تشوف نفسك انجزت هالشغله.
برمج عقلك على الهدف اللي حاب تنجزه عشان تتهيأ نفسيا لإنجازه وتصير مستعد له.
افضل الاوقات لبرمجة عقلك الباطن: قبل النوم واول ماتصحى وفي وقت الحدث
ثالثا: الدافع (الرغبه)
لازم يكون عندك رغبه صادقه في تحقيق هذا الامر لان لو ماكنت جاد في هالشي ماراح تنجح في انجازه ابدا. لذالك حدد اهداف انت فعلا حابها وصادق في تنفيذها.
ذكر نفسك دائما بالسبب اللي خلاك تختار هذا الهدف وليش تبي تنجزه وهالشي راح يكون مثل الدافع لك. مثلا حاب تتعلم لغه جديده لتكسب وظيفه افضل او عشان تدرس في الخارج. هنا توفر عندك الدافع اللي ينمي رغبتك في تحقيق هذا الهدف.
لابد يكون الدافع حقيقي ونابع من قلبك عشان تتكون عندك الرغبه وبالتالي الاراده.
رابعا: الاراده والعزيمه:
لما يتكون عندك الدافع راح تتعزز عندك الاراده وبالتالي تنمو العزيمه وماتنطفي ابدا. لابد تحافظ ع ارداتك وعزيمتك عاليه عشان ماتفقد الرغبه. وهالشي ممكن يتحقق بالتخيل، كيف؟
خامسا: التخيل
المقصود فيه تخيل النتيجه بمعنى آخر لازم تحفز نفسك بتخيل نتيجة الهدف اللي انت تسعى لتحقيقه. مثلا لما تتعلم لغه راح يصير عندك فرص وظيفيه اكثر وراح تقدر تدرس برا، فلما تتخيل نفسك وانت طالع برا تدرس وتاخذ شهاده كويسه او تتخيل شكلي وانت في وظيفه كويسه راح تتحمس تكمل المشوار وماتمل وتستمر في تحقيق هدفك الين يصير التخيل واقع.
ارسم صورة واضحه لهدفك والنتيجه اللي تتمناها من هذا الهدف.
سادسا: التخطيط
انت لما تحدد هدفك لازم تخطط كيف راح تنجزه. اختار المدة والطريقه المناسبه لانجازه. ولاتنسى الخطه لابد ان تكون مرنه تحسبا لاي امر طاريء.
التخطيط المنطقي يؤدي الى النجاح.
سابعا: التنفيذ
انقل هدفك من مرحلة التخيل والكلام والتخطيط الى مرحلة التنفيذ على ارض الواقع. ابدأ بتنفيذ الخطه اللي اخترتها وتناسب قدراتك.
التنفيذ يكون في فتره زمنيه مناسبه مثلا تعلم اللغه ماينفع تحققه خلال شهر لذالك لابد تكون منطقي في تحديد المده المناسبه للانجاز. كل يوم حاول تنجز شي بسيط يقربك خطوه من هدفك اللي تسعى لتحقيقه بحيث في نهاية الفتره المحدده تكون فعلا انجزت المهمه. نرجع لمثال تعلم اللغه لو قلنا حددت سنه لتعلمها راح تقسم ايامك الى مثلا يوم تستمع لهذي اللغه ويوم تقرأ مقالات او كتب مكتوبه بهذي اللغه ويوم تحفظ كلمات وهكذا بحيث تنتهي السنه وانت فعلا متعلم هذي اللغه، هذي الامور راح تصير مثل الروتين عندك.
ثامنا:الصبر
خل في بالك دائما مافي شي يصير في يوم وليله والتغيير لابد ياخذ وقته لذالك اصبر ولاتمل بسرعه حتى لو فشلت اصبر مصيرك تنجح بالمحاولات، اقرب مثال الطبخ ماراح تتعلم الطبخ في يوم لابد يطلع عندك الملح مره زايد او الزيت ومره العكس وتظل تكرر نفس الامر ولكن في كل مره تحاول تتعلم من الخطأ الاول وتتفاداه وبعد اسبوع تلاقي طبخك صار افضل ليش! لانك صبرت واستمريت بالمحاوله والتعلم من الاخطاء.
تاسعا:المثابره (الالتزام/الانضباط)
الاستمرار مهما كان عدد المحاولات الفاشله ومهما حسيت بالملل، يعني تظل مستمر في تحقيق الشي اللي تبيه وتسخر الظروف لخدمة هالشي واقرب مثال الطبخ مثل ماذكرت في النقطه السابقه لاتمل ولاتيأس وتأكد بأن الله مايضيع تعب اي عبد من عباده مادام صادق في عمله ومخلص في نيته.
التزم بالخطه اللي سويتها لنفسك وعاند نفسك ولاتتخلى عنها وعدلها بحسب وضعك الحالي.
عاشرا: المرونه
مثل ماذكرت قبل الخطه لابد تكون مرنه وطريقتك في التنفيذ بعد بمعنى يكون فيه مجال للتعديل لان ماحد يضمن وش يصير معه خلال يومه مثلا لو كان عندك حفله اليوم وماقدرت تنفذ المطلوب في الخطه عادي مو مشكله عوض هذا الشي في اليوم الثاني وكمل اهم شي ماتنقطع عن التنفيذ لفتره طويله.
ولاتنسى "ان الله لايغير مابقوم حتى يغيروا مابأنفسهم" غير مبادئك وتفكيرك وراح تتغير حياتك ونظرتك لنفسك بإذن الله
Note: What's written here is mine. It's the result of my readings and experiences so don't mention it as yours please. Express your admiration of my posts by sharing others but don't forget to mention my name ( kselfhelp.blogspot.com), I'll be grateful for this. Be as you want. Don't imitate others. Don't steal others' work and do your best for yourself.
ملاحظة: كل مايكتب هنا ثمرة قرائتي و حصيلة تجاربي فلا تنسب لنفسك جهدي وتعبي لك حرية التعبير عن اعجابك بما كتب هنا بمشاركته الاخرين و لكن بشرط ذكر المصدر (kselfhelp.blogspot.com) و لك جزيل الشكر والامتنان كن كما تود ان تكون ولا تصبح مقلدا يسرق جهد الاخرين !ابذل القليل من الجهد
